अजरबैजानसँग आगामी केही महिनाभित्र शान्ति सम्झौता हुने

अजरवैजान । नागोर्नो–काराबाखलाई जातीय–अर्मेनियाली पृथकतावादीबाट बाकुले पुनः नियन्त्रणमा लिएपछि आगामी महिनाहरूमा अजरबैजानसँग शान्ति सम्झौतामा हस्ताक्षर गर्ने विश्वास आर्मेनियाली प्रधानमन्त्री निकोल पाशिन्यानले गरेका छन्।

अजरबैजानको आर्मेनियाली बाहुल्यता रहेको काराबाख क्षेत्रको नियन्त्रणका लागि येरेभान र बाकुबीच दशकौँदेखि द्वन्द्व चलिरहेको छ । बाकुले सेप्टेम्बरको अन्त्यमा २४ घण्टे आक्रमणमा पहाडी इलाकालाई पुनः प्राप्त गरेको थियो जसले दशकौंदेखिको आर्मेनियाली पृथकतावादी शासनको अन्त्य गरेको थियो ।

“हामी अहिले अजरबैजानसँग शान्ति र सम्बन्ध सामान्यीकरणसम्बन्धी सम्झौताको मस्यौदामा काम गरिरहेका छौं र मलाई आशा छ यो प्रक्रिया आगामी एक दुई महिनामा सफलतापूर्वक टुङ्गिनेछ,” पाशिन्यानले भने ।

जर्जियाको राजधानी तिब्लिसीमा आयोजित एक अन्तर्राष्ट्रिय आर्थिक मञ्चमा उनले भने, “भविष्यको शान्ति सम्झौता ककेशस (ब्ल्याक सी र क्यास्पियन सी) क्षेत्रका छिमेकीहरूको सोभियतकालीन सिमानाको पारस्परिक मान्यतामा आधारित हुनेछ ।

अजरबैजानका राष्ट्रपति इल्हाम अलियेभले यो वर्षको अन्त्यसम्ममा येरेभानसँग शान्ति सम्झौता गर्न सकिने बताएका छन् । येरेभानले ऊर्जाको धनी बाकुले आफ्नो फाइदालाई दबाउने प्रयास गर्न सक्ने आशङ्का व्यक्त गरेको छ ।

येरेभानले सहयोगी टर्कीको सहयोगमा दक्षिणी आर्मेनियाको जमिन कब्जा गरेर अजरबैजानसँग आफ्नो नखिचेभान क्षेत्रलाई जबर्जस्ती जोड्न सक्छ भन्ने आशङ्का व्यक्त गर्दै आएको छ ।

उसले बाकुलाई ‘जातीय सफाया’ को आरोप पनि लगाएको छ किनकि लगभग सबै जातीय अर्मेनियाली जनसङ्ख्या अर्थात् करिब एक लाख मानिसहरू बाकुको विशाल आक्रमणपछि आर्मेनियातर्फ भागेका थिए, जसले शरणार्थी सङ्कट निम्त्याएको थियो । एएफपी