रोमाञ्चक खेलमा बार्यनले युनाइटेडलाई हरायो, अरु नतिजा यस्ता छन्

एजेन्सी। यूईएफए च्याम्पियन्स लिग फुटबल प्रतियोगितामा बार्यन म्युनिखले म्यानचेस्टर युनाइटेडलाई हराएको छ ।

गएराति भएको खेलमा बार्यनले युनाइटेडलाई ४-३ गोलले हरायो । पहिलो हाफमा बार्यन २-० ले अघि रहेकोमा ४९ मिनेटमा रास्मसले गोल गरेर युनाइटेडलाई खेलमा फर्काउन खोजे ।

तर ५३ मिनेटमा बार्यनका ह्यारी केनले पेनाल्टीमा गोल गरेर खेल ३-१ को अवस्थामा ल्याए । ८८ मिनेटमा क्यासमिरोले गोल गरेर युनाइटेडलाई ३-२ मा पुर्‍याए । तर इन्जुरी समयको दोस्रो मिनेटमै बार्यनले गोल गरेर खेललाई ४-२ को अवस्थामा पुर्‍यायो । त्यसको तीन मिनेटमा युनाइटेडका क्यासमिरोले गोल गरे । अन्तिममा खेल ४-३ को अवस्थामा सकियो र बार्यनले बाजी मार्‍यो ।

गएराति नै भएका अरु खेलमा आर्सनलले पीएसभीलाई ४-० ले हरायो । आरबी साल्जबर्गले बेन्फिकालाई पराजित गर्दा नापोलीले क्लब बुर्गलाई हरायो ।  यस्तै रियल मड्रिडले युनियन बर्लिनलाई १-० ले हरायो ।

गालातासरे र कोपनहेगन, सेभिल्ला र लेन्स तथा रियल सोसिडाड र इन्टर मिलानले बराबरी खेलेका छन् ।