‘सोचेझैँ जिन्दगी रैनछ’ भन्दै छमछमी नाचे वामदेव (भिडिओ)

तीनै वामदेव अहिले तीजमा छमछमी नाचेर फेरि सोसल मिडियामा चर्चामा आएका छन्। उनले आफ्नै घरमा चेलीबेटीहरूसँग नाचेको गीत भने उनको जीवनसँग मिल्दोजुल्दो छ, ‘सोचेझैँ जिन्दगी रैनछ।’

नेपालभ्युज

काठमाडौं। अलि पहिला राजनीतिक वृत्तमा चर्चाको शिखरमा थिए– वामदेव गौतम। अहिले गुमनाम जस्तै छन्, उनी।

२०७७ को अन्तिमतिर नेकपा (एमाले र माओवादी मिलेर बनेको पार्टी) विभाजन हुन लाग्दा पार्टी एकता महाअभियान बोकेर अघि बढेका थिए उनी एमालेभित्रको विवाद मिलाउन पनि सक्रिय थिए ।

नेकपा फुट्न नदिने महाअभियानमा लागे पनि उनले जोगाउन भने सकेनन् । अन्नत एमाले र माओवादी अलग भए। एमाले एमालेमा पनि ओली र नेपाल आ–आफ्नो समूह लिएर अलग भए। वामदेवले भने कतै समूहमा नलाग्ने, बरु एकताको पक्षमा लाग्ने भन्दै छुट्टै महाअभियान घोषणा गरे।

उनले घोषणाको क्रममा आफ्नो महाअभियानले ‘छिट्टै आम जनता चकित पर्ने’ दाबी गरेका थिए।

नेपाली राजनीतिमा अस्थिरताको परिचय बनाइसकेका वामदेवले त्यो दाबी गरे पनि अहिले यतिबेला उनी गुमनाम जस्तै छन्। राष्ट्रियसभा सदस्य रहेका उनले बैठकमा बोलेका विषय पनि खासै चर्चामा आउँदैन।

सधैँ सत्ता र शक्तिमा बस्न रुचाउने वामदेवले तत्कालीन नेकपा हुँदा केपी ओली र पुष्पकमल दाहाल ‘प्रचण्ड’सँग भन्थे ‘म सँगैका साथीहरू सबै प्रधानमन्त्री बनिसके, तपाईंहरू पटक-पटक बनिसक्नुभयो ? मेरो पालो कहिले ?’

पटक-पटक मन्त्री र उपप्रधानमन्त्रीसम्म बनेका वामदेवको प्रधानमन्त्री बन्ने चाहना र सपना पूरा हुन सकेको छैन।

तीनै वामदेव अहिले तीजमा छमछमी नाचेर फेरि सोसल मिडियामा चर्चामा आएका छन्। उनले आफ्नै घरमा पत्नी र चेलीबेटीहरूसँग नाचेको गीत भने उनको जीवनसँग मिल्दोजुल्दो छ, ‘सोचेझैँ जिन्दगी रैनछ।’