काठमाडौं। काठमाडौं महानगरका मेयर बालेन साहले कुनै पनि हालतमा महानगरभित्र हिन्दी फिल्म चल्न नदिने बताएका छन् ।
उनले अदालतले दिएको आदेश नमान्ने धम्की दिँदै भनेका छन्, ‘जहाँ सवाल देशको सार्वभौमिकता र स्वाधीनताको आउँछ म कुनै कानुन र अदालतलाई मान्नेवाला छैन ।’
विवादित फिल्म आदिपुरुषका लेखकले समेत नेपाल भारतको अधीनमा भएको स्वीकारेको अवस्थामा नेपाली चुप लागेर बस्न नहुने उनको तर्क छ । ‘फिल्म लेखकले नेपाल भारतको अधीनमा थियो भनिसकेपछि उनीहरूको नियत थाहा हुन्छ’, बिहीबार सामाजिक सञ्जालमा स्टाटस लेख्दै उनले भनेका छन्, ‘यो कुरालाई नेपाल सरकारले स्टन्ट भन्नू र अदालतले फिल्म चल्न दिनु भनेको नेपाल भारतको अधीनमा थियो, अदालत र सरकार भारतको गुलाम भएको बुझिन्छ ।’
उनले यही स्थितिमा जुनसुकै सजाय भोग्न तयार भएको, तर फिल्म चल्न नदिने बताएका छन् ।
उच्च अदालत पाटनले बिहीबार भारतीय चलचित्रलगायत सेन्सर बोर्डले स्वीकृत गरेका चलचित्रको प्रदर्शन नरोक्न अल्पकालीन अन्तरिम आदेश दिएको थियो ।
Facebook Comment
Comment