कुनै बहानामा विद्यालय बन्द गरे शिक्षक र कर्मचारीलाई कारबाही गर्ने बालेनको चेतावनी

काठमाडौं। काठमाडौं महानगरपालिकाले असार ३ गते सामुदायिक विद्यालयका पठनपाठन बन्द गर्ने भनी केही पत्रपत्रिकामा आएको समाचारप्रति आफ्नो ध्यानाकर्षण भएको जनाएको छ। महानगरका प्रमुख बालेन शाहले कसैले कुनै बहानामा सामुदायिक विद्यालय बन्द गरे कारबाही गर्ने चेतावनी दिएका छन्।

विद्यालयलाई शान्तिक्षेत्र घोषणा गरिएको तथा विद्यालय शान्तिक्षेत्र राष्ट्रिय ढाँचा र कार्यान्वयन निर्देशिका २०६८ को बुँदा न ६.२ को (घ) ले विद्यालयमा कुनै पनि दलीय राजनीतिक तथा अन्य स्वार्थका लागि विद्यालय बन्द, हडताल र पठनपाठनमा अवरोध गर्ने जस्ता क्रियाकलापहरू नभएको हुनुपर्ने कुरा सामाजिक सञ्जालमा  स्मरण गराउँदै प्रमुख शाहले काठमाडौं महानगरपालिकाभित्रका विद्यालयमा विद्यालय शान्तिक्षेत्रको अवधारणाविपरीत हुनेगरी कुनै पनि कार्य गर्न बन्देज गरिएको उल्लेख गरेका छन् ।

साथै, उनले काठमाडौं महानगरपालिकाका सम्पूर्ण सामुदायिक विद्यालय, सामुदायिक विद्यालयमा कार्यरत कर्मचारीहरू एवं विद्यालय व्यवस्थापन समितिलाई  विद्यालयहरूमा नियमित कक्षा सञ्चालन गर्नसमेत निर्देशन दिएका छन् ।