उन्मुक्तिकी अध्यक्ष रञ्जिता भन्छिन्, थारूलाई अपराधी मात्र देख्ने सरकारलाई हाम्रो समर्थन नचाहिने रहेछ

नेपालभ्युज

धनगढी। नागरिक उन्मुक्ति पार्टीकी अध्यक्ष रञ्जिता श्रेष्ठले आफ्ना सांसद अरुणकुमार चौधरी समातिएको घटनामा प्रतिक्रिया दिएकी छन् ।

सामाजिक सञ्जालमा स्टाटस लेख्दै उनले कैलाली क्षेत्र नं. २ बाट निर्वाचित चौधरीलाई नियन्त्रणमा लिएकोमा विरोध गरेकी छन् । ‘अपराधी थारूलाई मात्र देख्ने सरकारलाई हाम्रो समर्थन चाहिँदैन रहेछ’ उनले फेसबुकमा लेखेकी छन् ।

सांसद चौधरीलाई १० वर्षअघि ट्याक्टर जलाएको मुद्दामा कैलाली जिल्ला अदालतले ६ महिना कैदको फैसला सुनाएको थियो । तर, उनी कैद भुक्तान नगरेर फरार थिए । उनलाई बिहीबार बाँकेको कोहलपुरबाट पक्राउ गरिएको थियो ।

जिल्ला अदालत कैलालीले प्रतिनिधिसभा सदस्य रहेका अरुण चौधरीसहित पशुराम चौधरी र वीरबहादुर चौधरीलाई २०७० वैशाख ९ गते जनही ६ महिना कैद र ८ लाख १८ हजार ४२३ रुपैयाँ पीडितलाई उपलब्ध गराउने फैसला गरेको थियो ।