काठमाडौं। नेपाल क्रिकेट संघ (क्यान)का अध्यक्ष चतुरबहादुर चन्दले नेपाल टी–२० लिगका क्रममा विवादास्पद कम्पनी सेभेन थ्री स्पोर्टससँग सम्झौता गर्दा त्रुटि भएको स्वीकार गरेका छन् ।
बिहीबार आयोजित पत्रकार सम्मेलनमा उनले सम्झौता गर्दा त्रुटि भएपनि यसमा आफूहरूको नियत गलत नभएको दाबी गरे ।
नेपाल प्रहरीको अनुसन्धानले त्रिवि क्रिकेट मैदानमा भएको टी–२० लिगमा स्पट फिक्सिङ भएको देखाएको छ । नेपाली क्रिकेटर आदिल आलम र पूर्व क्रिकेटर मोहबुब आलम यसअघि पक्राउ परेका छन्, भने उनीहरूसहित १० जनाविरुद्ध मुद्दा चलाउने प्रहरीको तयारी छ ।
अध्यक्ष चन्दले त्रुटि जानाजानी नभएको बताए । क्यानले २०२० जनवरीमा एमओयू र त्यसको एक वर्षपछि पहिलो सम्झौता गरेको थियो । राष्ट्रिय खेलकदु परिषद् (राखेप)को अनुमति लिएर मात्र सम्झौता गर्नुपर्नेमा त्यसको पालना नभएको अध्यक्ष चन्दले स्वीकार गरे । उनले भने, ‘तर राखेपले अनुमति नदिएसम्म हामीले कुनै पनि काम गरेनौँ ।’
उनले राष्ट्रिय खेलकुद परिषद् र सीआईबीले अनुसन्धान गरिरहेकाले बेटिङको विषय धेरै नतन्काउन आग्रह गरे । सम्झौताअनुसार काम अघि बढाउन रणनीतिक साझेदार सेभेन थ्री स्पोर्टसलाई दबाब दिन नसक्नु कमजोरी भएको उनको तर्क थियो ।
क्यानका कार्यवाहक सचिव प्रशान्त विक्रम मल्लले सेभेन थ्री स्पोर्ट्सलाई पुरस्कार राशिको लागि ताकेता गरिरहेको बताए । सेभेन थ्री स्पोर्ट्सले पैसा नदिए कानुनी उपचारमा जाने पनि उनले जनाए ।
Facebook Comment
Comment