भीम रावलले एमाले नछाड्ने, पार्टीमै रहेर न्यायका लागि लड्ने घोषणा

नेपालभ्युज

काठमाडौं। नेकपा (एमाले) का नेता भीम रावलले पार्टी नछोड्ने घोषणा गरेका छन् ।

काठमाडौंमा आयोजित पत्रकार सम्मेलनमा उनले चुनावमा टिकट पाउन नसके पनि पार्टी भित्रै रहेर न्याय र स्वाधीनताका लागि लड्ने बताए ।

चुनावमा टिकट पाउन नसकेकोबारे सम्मेलनमा उनले भने, ‘मलाई कसरी रोक्न सकिन्छ भनेर छलफल गरेका सूचनाहरु आई नै रहेका थिए । मलाई हराउन सकिँदैन भन्ने भएपछि उम्मेदवारी रोकियो । मेरो उम्मेदवारी रोकिँदा जनता र कार्यकर्तामा उत्पन्न हुने प्रतिक्रियाका कारण सिफारिस नै नभएको व्यक्तिलाई उम्मेदवार बनाइयो’ रावलले भने, ‘यस्तो गर्नु कार्यकर्ता र जनताको भावनालाई कुल्चनु हो । यस्तो कार्य गर्नु स्वेच्छाचारी निन्दनीय कार्य हो ।’

उनले आफूले टिकट नपाए पनि आगामी मंसिर ४ को चुनावमा योग्य उम्मेदवारलाई जिताउन कटिबद्ध भई लाग्ने बताए ।