दार्चुलाको बाढी पहिरोमा हराएका १० जना अझै भेटिएनन्, मन्त्रीसहितको टोली घटनास्थलमा

दार्चुला। दार्चुलामा शुक्रबार राती र शनिबार विहानको बाढी पहिरोमा परेर वेपत्ता भएका १० जना अझै भेटिएका छैनन् । बाढीपहिरोमा चार जना महिला र छ जना पुरुष गरी १० जना बेपत्ता भएका छन्। बेपत्ताको खोजीकार्य भइरहेको जिल्ला प्रहरी कार्यालयले जनाएको छ।

अहिलेसम्म पाँच जनाको ज्यान गएको छ । जसमा तीन जना महिला दुई जना पुरुष गरी पाँच जना रहेका छन्। आठ जना घाइते भएका छन् । ज्यान गुमाउनेको पहिचान पनि खुलेको छ। त्यसमध्ये सनाखत हुनेमा महाकाली नगरपालिका–२ मुल्ला ७७ वर्षीय नन्दराम बोहरा, महाकाली–३ डुङ्री बस्ने ३५ वर्षीया मानमती कार्की रहेका छन् भने नौगाड गाउँपालिका वडा नं १ बस्ने ३५ वर्षीया जानकी ठगुन्ना, १५ वर्षीया धनुली ठगुन्ना र ४५ वर्षीय मोहनराम पार्की रहेका छन्।

पहिरामा परी घाइते भएका नौगाड गाउँपालिकाका रामसिंह ठगुन्ना, वीरा ठगुन्ना, फागुली ठगुन्ना र जयबहादुर ठगुन्नालाई सुर्खेतबाट आएको नेपाली सेनाको हेलिकप्टरमार्फत जिल्ला अस्पताल पुर्‍याएर उपचार भइरहेको छ भने २० वर्षीया सुत्केरी हरिना महरको जिल्ला अस्पतालमा उपचार सम्भव नभएपछि नेपाली सेनाको हेलिकप्टरमार्फत धनगढी पठाइएको सहायक प्रमुख जिल्ला अधिकारी हेमन्ती साउदले जानकारी दिइन ।

महाकाली नगरपालिका बङ्गाबगरमा पार्किङमा रोकेर राखेको अवस्थामा जीप छ, कार एक, ट्र्याक्टर एक, स्काभेटर एक गरी जम्मा नौ वटा सवारीसाधन पनि बाढी पहिरोमा बगेका छन् । त्यस्तै ४२ घर जगैदेखि बगेका छन् भने वटा घरमा आंशिक क्षति भएको छ। चालीस घर अझै जोखिममा रहेको जिल्ला प्रहरी कार्यालयका सूचना अधिकारी लोकेन्द्रबहादुर सिंहले बताए ।

महाकाली–३ मा रहेको दशरथ आधारभूत विद्यालयसमेत बगाएको छ। बाढीले महाकाली–३ मा रहेको डुङ्ग्री विद्युत् पावर हाउसमा पनि पूर्णरुपले क्षति भएको छ। झोलुङ्गे पुल दुई र मोटरेवल पुल एक गरी जम्मा तीन पुलमा पूर्ण क्षति भएको छ। सदरमुकाम खलङ्गामा खानेपानीको समेत हाहाकार मच्चिएको छ।

स्थानीय बलवीर ठगुन्नाले शनिबार बिहानदेखि खानेपानीको निकै समस्या भएको र नेपाली सेनाले ब्यारेकबाट खानेपानी सहज गरिदिएको बताएर। घटनास्थलमा नेपाली सेना, नेपाल प्रहरी, सशस्त्र प्रहरी र स्थानीयले विपद्मा परेकाको उद्धार र बेपत्ता भएकाको खोजीकार्य जारी राखेका छन्।

यसैबीच, उद्योग वाणिज्य तथा आपूर्तिमन्त्री दिलेन्द्र बडुसहितको टोली राहत लिएर घटनास्थलमा पुगेको छ ।  धनगढीबाट राहत सामग्री बोकेर सेनाको वाणिज्यमन्त्री दीलेन्द्रप्रसाद बडू, सुदूरपश्चिम प्रदेशका आन्तरिक मामिला तथा कानुनमन्त्री रणबहादुर रावल, सुदूरपश्चिम प्रदेशका वन वातावरण उद्योग तथा पर्यटनमन्त्री मानबहादुर धामीसहितको टोली सदरमुकाम खलङ्गा पुगेको छ।