रुसले कब्जा गरेका कतिपय क्षेत्र फिर्ता ल्याएको युक्रेनको दाबी

कीभ। युक्रेनका राष्ट्रपति जेलेन्स्कीले रुसबाट धेरै सहरहरु पुनः कब्जा गरेको दाबी गर्दै आफूसँग “राम्रो समाचार” रहेको बताएका छन्। पूर्वी खार्किभ क्षेत्रमा युक्रेनी सेनाले रुसी सेनालाई पछि हटाउँदै लगेको समाचार आइरहेका बेला राष्ट्रपति जेलेन्स्कीले आफुसँग राम्रो समाचार भएको बताएका बीबीसीले जनाएको छ।

जेलेन्स्कीले कुन ठाउँहरू पुन: कब्जामा लिएको भन्ने बारेमा भने खुलाएका छैनन् । यस्तै अमेरिकी अधिकारीहरूले पनि युक्रेनले रूसी सेनाहरू विरुद्ध ढिलो तर अर्थपूर्ण प्रगति गरिरहेको  जनाएका छन्। आफ्नो रातको भिडियो सम्बोधनमा बोल्दै राष्ट्रपति जेलेन्स्कीले युक्रेनी सेनाको सफलताको बारेमा “राम्रो समाचार” रहेको बताए।

“मलाई लाग्छ कि हरेक नागरिकले हाम्रा सिपाहीहरूमा गर्व महसुस गर्छन्,” उनले विशिष्ट सैन्य एकाइहरूको नाम दिएर र लडाईमा बहादुरीको प्रशंसा गर्दै भनेका छन् ।

युक्रेनले पछिल्ला हप्ताहरूमा आफ्नो सुरक्षालाई कडा पारेको छ । पूर्व र दक्षिणमा व्यापक रूपमा अपेक्षित काउन्टर-आक्रमण भइरहेको युक्रेनी दाबी छ । युक्रेनी सैनिकहरूले खार्किभको दक्षिण-पूर्वमा, डोनेट्स्कको पूर्वी क्षेत्रतर्फ आक्रमण सुरु गरेका छन् । जसमा छ महिना अघि युद्ध सुरु भएदेखि रूसले पर्याप्त सैन्य नियन्त्रण कायम राखेको छ। केही रिपोर्टका अनुसार युक्रेनी सेनाहरू इज्युम शहरबाट केही किलोमिटर मात्रै टाढा छन् ।  जुन रूसको सेनालाई बन्दोबस्तीका सामग्री आपूर्ति मार्गको महत्त्वपूर्ण लिङ्क हो।