जनकपुरधाम। नेपाल नागरिकता ऐन संशोधन गर्न पारित भएको विधेयकको शीघ्र प्रमाणीकरण गर्न तराई–मधेस लोकतान्त्रिक पार्टीले राष्ट्रपतिसँग माग गरेको छ ।
जनकपुरधाममा मंगलबार तमलोपाको केन्द्रीय कार्यालयमा अध्यक्ष वृषेशचन्द्र लालको अध्यक्षमा बसेको बैठकले यस्तो निर्णय गरेको हो ।
लामो छलफलपछि नेपाल नागरिकता ऐन संशोधन विधेयक संघीय संसदबाट पारित भइसकेपछि पनि त्यसको प्रमाणीकरणमा राष्ट्रपतिबाट भइरहेको ढिलाईले चिन्ता उत्पन्न गरिरहेको तमलोपाको ठहर छ ।
‘नागरिकता जस्तो संवेदनशील विषयमा यसरी भइरहेको अस्वाभाविक ढिलाइ उचित नभएको तथ्यप्रति सम्माननीय राष्ट्रपतिज्यूको ध्यानाकर्षण गराउँदै यो बैठक नागरिकतासम्बन्धी विधेयकको शीघ्र प्रमाणीकरणको माग गर्दछ ।’ तमलोपाले विज्ञप्तिमा भनेको छ ।
यसैगरी, तमलोपाको बैठकले आसन्न प्रदेश र प्रतिनिधिसभा चुनावमा भाग लिने निर्णय गर्दै अन्य राजनीतिक दलहरूसँग सहकार्य, गठबन्धन लगायतका विषयमा छलफल गर्ने जिम्मेवारी वरिष्ठ नेता डा. विजयकुमार सिंहलाई दिने निर्णय गरेको नेता उमेश मण्डलले बताए ।
यस्तै, निर्वाचन मिति घोषित भइसकेपछि पनि प्रतिनिधिसभा र प्रदेशसभा क्रियाशील भइरहनु लोकतान्त्रिक मान्यता र अभ्यासविपरीत तथ्य रहेको तर्क गर्दै तमलोपाले सबैको ध्यानाकृष्ट गराएको छ ।
Facebook Comment
Comment