नेपाल आउने तयारीमा उत्तर प्रदेशका मुख्यमन्त्री योगी आदित्यनाथ

काठमाडौं। भारत उत्तर प्रदेशका मुख्यमन्त्री योगी आदित्यनाथको नेपाल आउने तयारी चल्दैछ। सबै परिस्थिति ठीक रहेको खण्डमा साउनको अन्तिम साता आदित्यनाथले नेपाल भ्रमण गर्नेछन्।

उत्तर प्रदेशका मुख्यमन्त्री आदित्यानाथको सम्भावित नेपाल भ्रमणका विषयमा जानकार स्रोतका अनुसार साउन महीनाको सोमबार पशुपतिनाथको दर्शन गर्ने गरि आदित्यनाथको नेपाल भ्रमण हुन लागेको हो।

“साउन महीनाको सोमबार पशुपतिनाथको मन्दिर दर्शन गर्नेगरी आदित्यनाथ नेपाल आउने तयारी हुँदैछ। सम्भवतः साउनको अन्तिम हप्ता भ्रमण हुन्छ,” स्रोतले दाबी गर्‍यो। आदित्यनाथको नेपाल भ्रमण राजनीतिकभन्दा बढी धार्मिक हुनेछ।

यसअघि २ जेठमा परेको बुद्ध जयन्तीको अवसरमा भारतीय प्रधानमन्त्री नरेन्द्र मोदीले नेपालको भ्रमण गरेका थिए। बुद्ध जयन्तीको अवसरमा लुम्बिनी आएका भारतीय प्रधानमन्त्री मोदी राजधानी काठमाडौं नआई लुम्बिनीबाट नै स्वदेश फर्किएका थिए। नेपालमा पछिल्ला केही समयदेखि अमेरिका र चीन जस्ता शक्ति राष्ट्रको उपस्थिति र चासो बढ्दा भारतले भने नेपालसँगको सांस्कृतिक सम्बन्धलाई अगाडि बढाउने नीति लिएको हो।

१८ चैतदेखि भारतको तीन दिने भ्रमणमा पुगेका नेपालका प्रधानमन्त्री शेरबहादुर देउवा पनि भारतको बनारस पुगेका थिए। हिन्दू धर्मवलम्बीले बनारसलाई पवित्र स्थानका रुपमा लिने गरेका छन्।

पछिल्लो समय नेपाल विदेशी उच्च पदस्थ व्यक्तिको नेपाल भ्रमण बाक्लिदै गएको छ। नेपालको संसद्ले अमेरिकी सहयोग परियोजना एमसीसी पारित गरेसँगै नेपाल भ्रमणमा आउने विदेशीको संख्या बढ्दै गएको हो। नेपालको संसद्ले १७ फागुन २०७८ मा एमसीसी पारित गरेको थियो।

एमसीसी पारित भएसँगै अमेरिकी र चिनियाँ उच्च पदस्थ व्यक्ति नेपाल आउने क्रम बढ्दै गएको हो। विदेशी उच्च पदस्थहरुको नेपाल भ्रमण मात्रै होइन नेपाली उच्च पदस्थको विदेश भ्रमण पनि बढी नै रहेको छ।

संसद्ले एमसीसी पारित गरे लगत्तै नेपाल भ्रमणमा आउने पहिलो विदेशी चिनियाँ विदेशमन्त्री वाङ यी थिए। ११ चैतदखि उनले नेपालको तीन दिने भ्रमण गरेका थिए। यसबीचमा अमेरिकी उपविदेशमन्त्री उज्रा जिया ६ जेठमा, अमेरिकी सेनाका एशिया प्रशान्त क्षेत्रका कमाण्डिङ जनरल चाल्स ए फ्निल २७ जेठमा नेपाल भ्रमणमा आएका थिए। यस्तै २६ असारमा चिनियाँ कम्युनिष्ट पार्टीका विदेश विभाग प्रमुख लिउ जियान्छाओ नेपाल भ्रमणमा आएका थिए।