चुनाव चिह्न अस्पष्ट हुँदा कम सिट जित्यौँ : माधव नेपाल

सुर्खेत। नेपाल कम्युनिष्ट पार्टी (एकिकृत समाजवादी)का अध्यक्ष एवं पूर्वप्रधानमन्त्री माधवकुमार नेपालले स्थानीय तह निर्वाचनमा चुनाव चिह्न अस्पष्ट हुँदा कम सिट जितेको बताएका छन्। चुनाव चिह्न नयाँ भएकाले मतदाताले स्पष्ट बुझन् नसकेको उनले बताए।

पार्टीबाट निर्वाचित जनप्रतिनिधिलाई बधाई ज्ञापन गर्न सुर्खेत आएका नेता नेपालले पत्रकार सम्मलेनमा बोल्दै चुनाव चिह्न स्पष्ट नभएका कारणले कम सिट जितेको बताएका हुन्।

“स्थानीय तहको निर्वाचनमा चुनाव चिह्न अस्पष्ट हुँदा मत बदर भएकाले पनि हाम्रो पार्टीले धेरै सिट गुमाउनु परेको छ,” उनले भने, “मतदातामा चुनाव चिह्नको अस्पष्टताले सिट गुमाउनुपर्‍यो।”

निर्वाचन प्रणालीमा पनि त्रुटि प्रकट भएका कारणले यसलाई सुधार गर्नुपर्ने अध्यक्ष नेपालले बताए।

“यसको सुधार हुनुपर्छ। प्रहरी, प्रशासन र निर्वाचन आयोगको भूमिकाप्रति गम्भीर आरोप छन्,” उनले भने, “पैसाको चरम दुरुपयोग गर्ने प्रवृत्तिको अन्त्य हुनुपर्छ। वस्तु जस्तो किनेर देश लुट्ने प्रवृत्ति राम्रो होइन।”

स्थानीय तह निर्वाचनमा एकिकृत समाजवादीले गर्व गर्न लायक सफलता प्राप्त गरेको अध्यक्ष नेपालको भनाइ छ।

सत्ता गठबन्धन दलहरुबीच प्रदेश र संघको निर्वाचनमा पनि तालमेल हुने उनले बताए। अहिलेको जनभावना अनुसारको नीति कार्यक्रम र बजेट ल्याएको अध्यक्ष नेपालले बताए।