हामीले जित्नुपर्ने सिट जितेनौँ, गठबन्धनको समीक्षा हुन्छ : माधव नेपाल (भिडिओ)

काठमाडौं। नेकपा (एकीकृत समाजवादी)का अध्यक्ष माधवकुमार नेपालले गठबन्धनको विषयमा समीक्षा गर्नुपर्ने बताएका छन्।

मंगलबार २९ औँ मदन–आश्रित स्मृति दिवसको अवसरमा नेकपा (एकीकृत समाजवादी)ले पार्टी केन्द्रीय कार्यालयमा आयोजना गरेको कार्यक्रमलाई सम्बोधन गर्दै अध्यक्ष नेपालले गठबन्धनको विषयमा समीक्षा गरिने बताएका हुन्।

“हामी निर्वाचनको पनि गम्भीर समीक्षा गर्नेछौँ। गठबन्धनको पनि समीक्षा हामी गर्नेछौँ,” अध्यक्ष नेपालले भने, “समीक्षा गरेर कहाँ राम्रो भयो, कहाँ त्रुटि ग¥यौँ र आगामी दिनमा हामीले के कुरामा होस गर्नुपर्ने हो। त्यस हुनाले हामीले अहिलेसम्मको निर्वाचनको परिणाम अवश्य पनि हाम्रो पार्टीले प्राप्त गर्नुपर्ने जति छैन होला।”

अध्यक्ष नेपालले स्थानीय तह निर्वाचनको परिणाम आफ्नो पार्टीले प्राप्त गर्नुपर्ने जति नभएको बताए। उनले पार्टीले अपेक्षा गरेअनुसार मत परिणाम नआएको भन्दै गठबन्धनका घटकहरुले नै आफूहरुसँग सहकार्य गर्न नचाहेको उल्लेख गरे।

“गठबन्धन दलका सदस्यहरुले हामीसँग सहकार्य गर्न चाहेनन्। हाम्रा आफ्नै कुराहरु होलान्। अरुका आफ्नै गुनासाहरु होलान्,” अध्यक्ष नेपालले भने, “जे सुकै गरे पनि यो पार्टीलाई बलियो जगमा उभ्याउनु पर्नेछ। यो पार्टीलाई जनताको माझमा क्रियाशील गर्नुपर्ने छ।”

संख्याको हिसाबले ५०० को सदस्यको तहलाई आफूहरुले नाघिरहेको भन्दै अध्यक्ष नेपालले १०० जनाको संख्यामा वडाध्यक्ष र करीब १५, २० जना पालिकाका प्रमुख, उपप्रमुख जित्ने स्थिति बनेको बताए। उनले कतिपय ठाउँहरुमा अपेक्षित परिणाम प्राप्त गर्न नसकेको बताए।

नेपालले पार्टीलाई वैचारिक रुपमा दह्रो बनाउनुपर्ने बताए। उनले पार्टीलाई बलियो जगमा उभ्याउँदै जनताको माझमा क्रियाशील गराउन नेता, कार्यकर्ताहरुलाई आग्रह पनि गरे।