दाङमा छुट्टाछुट्टै दुर्घटनामा दुई जनाको मृत्यु

नेपालभ्युज

दाङ। दाङमा सडक दुर्घटनामा दुई जनाको मृत्यु भएको छ। घोराही ९ कटुकीदेखि नारायणपुरतर्फ आउँदै गरेको रा १ प ८३८६ नं को मोटरसाइकल घोराही ८ वनगाउँमा दुर्घटनामा परेको हो।

दुर्घटनामा गम्भीर घाइते घोराही १७ गुलरियाकी ३४ वर्षीया प्रमिला हमालको उपचारका क्रममा राप्ती स्वास्थ्य विज्ञान प्रतिष्ठानमा गएराति मृत्यु भएको प्रहरीले जनाएको छ। सोही घटनामा मृतकका छोरा १९ वर्षीय रोहित र १६ वर्षीया छोरी सविना घाइते भएका छन्। दुवैजनाको राप्ती स्वास्थ्य विज्ञान प्रतिष्ठानमा उपचार भइरहेको छ।

त्यसैगरी घोराही–तुलसीपुर सडक खण्डमा युपी ४२ विपी २४०१ भारतीय नम्बर प्लेटको ट्रकले ठक्कर दिँदा तुलसीपुर–१७ का आठ वर्षीय योगेश बस्नेतको मुत्यु भएको छ। ठक्करबाट गम्भीर घाइते उनको उपचारका लागि भारतको लखनउ लैजाने क्रममा मृत्यु भएको जिल्ला ट्राफिक प्रहरी कार्यालयले जनाएको छ। ट्रक चालक प्रहरीको नियन्त्रणमा छन्।