फिडे रेटिङ्ग बुद्धिचालको उपाधि रुपेशलाई

नेपालभ्युज

काठमाडौं। फिडेमास्टर रुपेश जैसवालले फिडे रेटिङ्ग बुद्धिचालको उपाधि जितेका छन्। उनले स्वर्गीय राजेशहरि जोशी स्मृति फिडे रेटिङ्ग बुद्धिचाल प्रतियोगिताको उपाधि जितेका हुन्।

ललितपुर स्पोर्टस् क्लबद्वारा आयोजित प्रतियोगितामा जैसवालले ९ खेलमा २ बराबरी र ७ जीतका साथ ८ अंक प्राप्त गरेका थिए। उपाधिसँगै उनले ५० हजार नगद पुरस्कार हात पारे।

त्यसैगरी समान साढे ७ अंक प्राप्त गरेपनि ‘प्रोग्रेसिभ टाइब्रेक’मा थापाथली चेस क्लबका फिडे मास्टर क्षितिज घिमिरे दोस्रो र सर्लाहीका कमल श्रेष्ठ तेस्रो भए।

पाँच दिने प्रतियोगितामा महिलातर्फ सुजाना लोहनी, अनिषा न्यौपाने, आभा पुडासैनी क्रमशः प्रथम, द्वितीय र तृतीय भए। अनरेटेडतर्फ सानुभाइ महर्जन प्रथम र विनय राई द्वितीय भए।

विजयी खेलाडीलाई आयोजक क्लबका अध्यक्ष हेराकाजी महर्जन र समारोहमा प्रमुख अतिथि राखेपका सदस्यसचिव रमेश सिलवालले पुरस्कार वितरण गरेका थिए।