मुलुकलाई समृद्ध बनाउनका लागि पर्यटन क्षेत्रको विकास गर्नुपर्छः उपप्रधानमन्त्री महासेठ

काठमाडौं । उपप्रधानमन्त्री एवं भौतिक पूर्वाधार तथा यातायातमन्त्री रघुवीर महासेठले मुलुकलाई समृद्ध बनाउनका लागि पर्यटन क्षेत्रको विकास गर्नेतर्फ केन्द्रित हुनु आवश्यक रहेको बताएका छन् ।

नेपाल होटल तथा पर्यटन व्यवसायी महासंघ, मधेस प्रदेशको दोस्रो अधिवेशनको उद्घाटन सत्रमा बोल्दै उपप्रधानमन्त्री महासेठले पर्यटनको प्रचुर सम्भावना बोकेको नेपालमा हरेक क्षेत्रबाट पर्यटन क्षेत्रको विकासका लागि अग्रसर हुनुपर्नेमा जोड दिए ।

प्राकृतिक सौन्दर्यता, भौगोलिक विविधता, सांस्कृतिक तथा धार्मिक दृष्टिकोणले समृद्ध प्रदेश मधेस रहेकाले मधेसमा समेत पर्यटनको प्रचुर सम्भावना रहेको उनको भनाई थियो ।

उपप्रधानमन्त्री महासेठले जनकपुरधाममा माता सीताको जन्म, ऋषि मुनिहरूको शास्त्रार्थ गर्ने थलो, ५२ कुट्टी तथा ७२ कुण्डको शहर रहेकाले यस ठाउँको सौन्दर्यीकरण तथा विकासका लागि बाह्य चक्रपथको डिपिआर आफू यस अघि भौतिक मन्त्री भएकै बेलामा भई सकेकाले सो को निर्माण कार्य छिट्टै नै अगाडी बढाइने जानकारी दिए।

उनले जनकपुरधाम–अयोध्या र अयोध्या–जनकपुरधाम रेल सञ्चालनका लागि मन्त्रालयले प्रक्रिया अगाडी बढाएकाले चाडै रेल सञ्चालन हुने विश्वास पर्यटन व्यवसायीहरूलाई दिलाए ।

नेपाल होटल तथा पर्यटन व्यवसायी महासंघका प्रदेश अध्यक्ष हिरालाल गौतमको अध्यक्षतामा भएको कार्यक्रममा प्रदेशसभा सदस्यहरु दीपेन्द्र ठाकुर, रामअशिष यादव, शारदा थापा, जनकपुरधाम उपमहानगरपालिकाका नगरप्रमुख मनोजकुमार साह, होटल व्यवसायी विजय झुनझुनवाला, महासङ्घका महासचिव मोहन शर्मा, नेपाल होटेल तथा पर्यटन व्यवसायी संघ धनुषाका अध्यक्ष सुरेन्द्र भण्डारी लगायतको उपस्थिति रहेको थियो ।

महासंघले उत्कृष्ट सेवा प्रदान गरेवापत महोत्तरी होटल व्यवसायी संघलाई सम्मानपत्र सहित सम्मान गरेको थियो ।