काठमाडौं । नेकपा एमालेका उपाध्यक्ष तथा पूर्वअर्थमन्त्री विष्णुप्रसाद पौडेलले आगामी आर्थिक वर्षको बजेटका सिद्धान्त र प्राथामिकतालाई पुनःलेखन गर्न सुझाव दिएका छन् ।
बिहीबार प्रतिनिधि सभा बैठकको बजेटका प्राथामिकता र सिद्धान्तमाथि छलफलमा भाग लिँदै एमालेका उपाध्यक्ष पौडेलले अर्थमन्त्री वर्षमान पुनलाई यस्तो सुझाव दिएका हुन् ।
अर्थमन्त्री पुनलाई निवर्तमान अर्थमन्त्री डा. प्रकाशशरण महतले पेस गरेको प्रस्तावलाई सांसदमा भएको छलफल र सांसदहरुको धारणाको आधारमा पूर्णरुपमा परिमार्जन गर्न आग्रह गरे ।
उनले अघिल्ला अर्थमन्त्रीले संसदमा प्रस्तुत गरेको बजेटका सिद्धान्त र प्राथामिकतलाई कानूनी र व्यवहारिक समस्याले संसदमा छलफल गर्नुपरेको बताए ।
पौडेलले बजेटका सिद्धान्त र प्राथमिकता प्रस्तुत गर्ने अर्थमन्त्री नभएपछि वर्तमान अर्थमन्त्रीले पुन: बजेटका सिद्धान्त र प्राथामिकता पस्तुत गर्न पाउनुपर्ने आशय व्यक्त गरे ।
बजेटका सिद्धान्त र प्राथामिकतलाई देशका समस्या समाधान हुनेगरी परिवर्तन गर्न उनले अर्थमन्त्रीलाई सुझाव दिएका हुन् ।
उनले अघिल्ला अर्थमन्त्री महतले पेस गरेको आगामी आर्थिक वर्षको बजेटका सिद्धान्त र प्राथामिकता ‘शब्द र वाक्यको भीड मात्रै’ भएको बताए ।
बजेटको सिद्धान्त र प्राथामिकता परिमार्जन नगरेसम्म समर्थन गर्न लायक नभएको उनले जिकिर गरे ।
Facebook Comment
Comment