विश्वासको मत दिन प्रदेश सभामा मुख्यमन्त्री यादवको प्रस्ताव

जनकपुर । मधेस प्रदेशका मुख्यमन्त्री सरोजकुमार यादवले विश्वासको मतका लागि प्रदेश सभामा प्रस्ताव प्रस्तुत गरेका छन् ।

जनमत पार्टीको अवरोधपछि झण्डै दुई घण्टा अवरुद्ध हुन पुगेको प्रदेशसभामा मुख्यमन्त्री यादवले विश्वासको मत दिन आग्रह गरेका हुन् । उनको प्रस्तावमा अहिले प्रदेशसभा सांसहरुले धारणा राखिरहेका छन् ।

नेकपा एमाले र जनमतले मुख्यमन्त्री यादवलाई विश्वासको मत नदिने तयारी गरेका छन् ।

दिउँसो २ बजे बसेको पहिलो बैठकमा जनमत पार्टीका सांसदहरुले मुख्यमन्त्री यादवले विश्वासको मत लिनुअघि माफी माग्नु पर्ने अडान लिँदै अवरोध गरेपछि सभामुखले बैठक १० मिनेटका लागि स्थगित गरेका थिए । प्रदेशसभा सुरु हुनसाथ जनमतका सांसदहरुले उभिएर विरोध जनाएका थिए।

उनीहरूले सप्तरीको राजविराजस्थित कृषि विश्वविद्यालयको शिलान्यासको क्रममा माघ ८ गते जनमत पार्टीका तत्कालीन शिक्षा तथा संस्कृतिमन्त्री महेश यादव र सांसहरुमाथि भएको आक्रमणको विषयमा मुख्यमन्त्रीसँग जवाफ मागेका थिए।

जसपा अध्यक्ष उपेन्द्र यादवले विश्वविद्यालय शिलान्यास गर्न खोज्दा भएको झडपमा मन्त्री यादवको टाउको फुटेको थियो भने जनमतका सांसदहरु समेत घाइते भएका थिए।