रविनाको सुसाइड नोट : ‘बच्चालाई एक्लै छाडेँ भने दुःख पाउँछन्, सँगै लिएर गएकी छु’

काठमाडौं । ‘म कहिल्यै नफर्कने गरी जाँदैछु । म गएपछि मेरा बच्चा एक्ला हुन्छन् । यसैले यत्तिकै छाडेँ भने उनीहरूले झन् धेरै दुःख पाउँछन् । त्यसैले सँगै लिएर गएकी छु’ इमाडोलकी ३६ वर्षीय रविना महर्जनको सुसाइड नोट हो यो ।

जसले गत शनिबार आफ्नी घरको तेस्रो तल्लाबाट फालहालेर आत्महत्या गरेकी थिइन् ।

ललितपुरको महालक्ष्मी नगरपालिका– ३ इमाडोलमा चार तल्ले घरको तेस्रो तलाबाट हामफालेकी रविनाको सुसाइड नोट फेला परेको हो । सुसाइड नोटमा आफूले बच्चाको हत्या गरेका समेत उल्लेख गरेको अनुसन्धानमा संलग्न एक अधिकृतले बताए ।

उनले आफन्तहरूलाई पठाएको सुसाइड नोटमा लेखिएको कुरा उद्धृत गर्दै अनुसन्धानमा संलग्न एक अधिकारी बताउँछन्, ‘म मरेपछि बच्चा एक्ला हुने भएकाले सँगै लिएर जाने कुरा उल्लेख छ ।’

रविनाले फालहालेपछि उनका दुई सन्तानहरू ६ वर्षीय छोरा अश्वेत महर्जन र दुई वर्षीया छोरी रिवा महर्जन पनि मृत फेला परेका थिए । प्रहरीका अनुसार उनले तकियाले मुख छोपेर हत्या गरेको देखिएको छ ।

अनुसन्धानमा खटिएका प्रहरी अधिकृतहरूका अनुसार उनले आफ्ना माइती पक्ष र दिदीबहिनीलाई सुसाइड नोट पठाएकी थिइन् ।

उनले आफ्ना श्रीमान्लगायत परिवारका कुनै पनि सदस्यको दोष नभएको उल्लेख गरेकी छिन् । रविनामा पहिला त्यस्तो कुनै मानसिक समस्या पहिचान भएको थिएन ।

‘नानीबाबुको ख्याल राख्नु’ भन्दै तीन तलाबाट फाल हालिन् रबिना, मारिए अश्वेत र रिवा !

शनिबार अपराह्न सवा ४ बजेतिर घरको तीन तलामाथिबाट झर्दै गरेको देखेपछि स्थानीयले रविनालाई उद्धार गरेर किस्ट अस्पताल लगेका थिए ।

कोठामा उनका दुई बच्चा पनि बेहोस अवस्थामा भेटिएका थिए । त्यसपछि साढे ४ बजे प्रहरीले घटनाबारे जानकारी पाएको थियो । अस्पतालले तीनैजनालाई मृत घोषणा गरेको थियो ।

रविनाको एकै घरमा परिवारका सबै सदस्यहरू छुट्टाछुट्टै बस्थे । सबैभन्दा माथिल्लो तल्ला अर्थात् चौथो तल्लामा रविनका सासूससुरा बस्दै आएका छन् ।

३ जना दाजुभाइ भएका उनीहरू जेठोको परिवार तेस्रो तल्लामा बस्थे । माइलाको परिवार दोस्रो तल्लामा र कान्छोका परिवार भुइँतल्लामा बस्दै आएका छन् ।