एसीसी हिमालयनले ल्यायो कपाल झर्न रोक्नेदेखि, अनुहार र पेटसम्मका लागि प्राकृतिक उत्पादन

काठमाडौं । उत्पादन तथा वस्तुहरूको उत्पादन र विक्रीवितरण गर्दै आएको कम्पनी एसीसी हिमालयनले स्वास्थ्य र सौन्दर्यका लागि गुणकारी उत्पादनहरूको शृङ्खला बजारमा ल्याएको छ ।

काठमाडौंको नयाँबानेश्वरमा आयोजित एक कार्यक्रममा ‘केशामृत’, ‘आयुर्ग्लो’, ‘प्रोस्टेट चिया’, ‘पन्चवटी ग्यास्ट्रिक पाउडर’ र ‘आरोग्य ग्यास्ट्रिक चिया’को उत्पादनको अनावरण तथा विक्री शुभारम्भ गरेको हो ।

घरेलु र प्राकृतिक विधिहरुमार्फत् घरगाउँमा प्रयोग गरिँदै आएको वस्तुहरूलाई प्रयोग गरेर यी बस्तु उत्पादन गरिएको हो ।

अनावरण कार्यक्रमका प्रमुख अतिथि काठमाडौं महानगरपालिका वडा नम्बर १०का वडासदस्य नरोज अर्यालले आफ्नै घर गाउँमा भएका प्राकृतिक गुणकारी वस्तुहरुमार्फत् निर्मित रसायनमुक्त उत्पादनहरूको प्रवर्द्धन हुनुपर्ने जोड दिए ।

यस्ता उद्यममा लागेका युवाहरूलाई स्थानीय सरकारसहित सबै तहका सरकारले सहयोग गर्नुपर्ने धारणा व्यक्त गरे ।

कार्यक्रमका अतिथि अखिल नेपाल राष्ट्रिय नाई मजदुर संघका केन्द्रीय अध्यक्ष बब्लु सिंहले कपाल झर्न रोक्ने तथा चायाँ पोतो हटाउनमा प्रभावकारी सिद्ध यी नेपाली उत्पादनहरूलाई प्रोत्साहन गर्दै देशव्यापी बनाउनु पर्ने धारणा व्यक्त गरे ।

अर्का अतिथि नेपाल नाई संघका उपत्यका अध्यक्ष राजेश ठाकुरले कपालसम्बन्धी धेरै उत्पादनहरूको खाँचो औँल्याउँदै एसीसी हिमालयनले आगामी दिनमा धेरै उत्पादनहरू ल्याउनुपर्ने कुरामा जोड दिए ।

यस्तै नेपाल नाई संघका केन्द्रीय अध्यक्ष गजेन्द्र ठाकुरले हाम्रो देश सानो भए पनि जडीबुटीमा धनी रहेको बताउँदै प्रशोधन र उत्पादन बढाउँदै लैजाँदा देशको अर्थतन्त्रमा सकारात्मक प्रभाव पर्न सक्ने विचार व्यक्त गरे ।

एसीसी हिमालयनका लाभकारी उत्पादनहरूको प्रचार प्रसार जरुरी भएको बताउँदै वहाँले आफ्नो संस्थामार्फत सकेको सहयोग प्रदान हुने बताए ।

युवा उद्यमीहरूद्वारा सञ्चालित एसीसी हिमालयनका तर्फबाट बाबु ढकालले स्वागत मन्तव्य राखे । कार्यक्रममा समापन मन्तव्य दिने क्रममा अतिथिहरूलाई धन्यवाद दिँदै एसीसी हिमालयनका प्रबन्ध निर्देशक दीपेन्द्र श्रेष्ठले घरेलु र प्राकृतिक विधिहरू मार्फत घरगाउँमा प्रयोग गरिँदै आएको वस्तुहरूलाई नै आफूहरूले व्यवसायीकरण गर्ने प्रयत्न गरेको बताए ।