बागमतीले लुम्बिनीलाई हरायो, इशानको अर्धशतक

काठमाडौं। प्रधानमन्त्री कप एकदिवसीय राष्ट्रिय क्रिकेटमा बागमतीले लुम्बिनी प्रदेशलाई पराजित गरेको छ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा शनिबार भएको खेलमा बागमतीले लुम्बिनीलाई ६ विकेटले पराजित गरेको हो।

१०७ रनको सामान्य लक्ष्य बागमतीले १७.२ ओभरमा ४ विकेटको क्षतिमा पुरा गर्यो। बागमतीका लागि इशान पाण्डेले अर्धशतकीय पारी खेले। ५४ बलमा ५ चौका र २ छक्का प्रहार गर्दै इशानले ५० रन बनाए। कप्तान रित गौतमले २४ र आशुतोष घिरैयाले १४ रन बनाए। लुम्बिनीका लागि निर्मल गुरुङले २ तथा कृष्णा कार्की र अभिषेक गौतमले १–१ विकेट लिए।

पहिले ब्याटिङ गरेको लुम्बिनी ३२.२ ओभरमा १०६ रनमा अलआउट भयो। लुम्बिनीका लागि कप्तान सुशान्त थापा २८ र निर्मल गुरुङले अविजित २७ रन बनाए।

बागमतीका लागि सूर्य तामाङले ६ विकेट लिए। प्रतियोगितामा सूर्यले हालसम्म कुल ३० विकेट लिएका छन्। विपिन आचार्यले २ तथा प्रतिस जिसी र कृजन गुरुङले १–१ विकेट लिए।

छैँटौँ जित हासिल गरेको बागमती १२ अंकसहित अंकतालिकाको दोस्रो स्थानमा छ। ६ खेलबाट मात्र २ अंक जोडेको लुम्बिनी भने नवौं स्थानमा छ।