काठमाडौं। प्रधानमन्त्री कप एकदिवसीय राष्ट्रिय क्रिकेट प्रतियोगितामा आज एपीएफले बागमती प्रदेशलाई पराजित गरेको छ। यो बागमतीको लगातार दोस्रो हार हो ।
कीर्तिपुरस्थित त्रिवि अन्तर्राष्ट्रिय क्रिकेट मैदानमा एपीएफले बागमतीलाई ८९ रनको फराकिलो अन्तरले हरायो । २४२ रनको लक्ष्य पछ्याएको बागमती ४२.५ ओभरमा १५२ रनमा अलआउट भयो।
बागमतीका लागि कप्तान रित गौतमले ६० र आशुतोष घिरैयाले ४१ रन बनाए। अन्यको प्रदर्शन उल्लेख्य रहेन ।
एपीएफका लागि रोहित पौडेलले ४ विकेट लिए । यस्तै मौसम ढकाल र अविनाश बोहराले २–२ तथा भुवन कार्की र पुरण विकको नाममा १–१ विकेट गयो ।
पहिले ब्याटिङ गरेको एपीएफले पुरै ओभर खेलेर ९ विकेट क्षतिमा २४१ रन बनाएको थियो ।
एपीएफका लागि सन्दीप जोराले शतकीय पारी खेले। सन्दीपले ११७ बलमा ७ चौका र ५ छक्का प्रहार गर्दै ११२ रन बनाएका थिए।
बागमतीका सूर्य तामाङले ३, रिजन ढकाल र प्रतिस जि.सी.ले २–२ र सोनु देवकोटाले १ विकेट लिए ।
Facebook Comment
Comment