काठमाडौं। काठमाडौं महानगरपालिकाका नगर प्रहरी प्रमुख राजु पाण्डेलाई आक्रमण गरेको आरोपमा प्रहरीले नारायण परिश्रमीलाई सुनसरीबाट पक्राउ गरेको छ। अर्का एक आरोपी काठमाडौंबाट पक्राउ परेका छन्।
नेपाल प्रहरीले सुनसरीबाट नारायण परिश्रमी र काठमाडौंको शंखमूलबाट हुकुमबहादुर लामालाई पक्राउ गरेको काठमाडौं प्रहरी परिसरले जनाएको छ। काठमाडौं महानगरले प्रहरीमा दिएको जाहेरीका आधारमा प्रहरीले उनीहरूलाई पक्राउ गरेर ज्यान मार्ने उद्योग र आपराधिक उपद्रो कसुरमा मुद्दा दर्ता गरेको छ ।
थापाथलीस्थित बागमती किनारमा रहेको सुकुम्बासी बस्ती खाली गर्न जाँदा गत मंसिर १२ गते महानगर प्रहरी प्रमुख पाण्डेमाथि बस्तीका स्थानीयले आक्रमण गरेका थिए । सोही आक्रमणमा पाण्डेसहित ३६ जना नगर प्रहरी घाइते भएको महानगरले जनाएको थियो ।
महानगरपालिकाका मेयर बालेन्द्र साह(बालेन)ले महानगरको उजुरीमा प्रहरीले असयोग गरेको भन्दै आएका थिए। उनले नगर प्रहरीमाथि आक्रमण गर्नेलाई खुलेआम छोडेको भन्दै आक्रोश व्यक्त गर्दै आएका थिए । यसै विषयमा उनले गृहमन्त्रीलाई समेत भेटेर सहयोग मागेका थिए।
Facebook Comment
Comment