मकवानपुरमा मतदान गर्न उत्साहित मतदाता, बिहानैबाट मतदानस्थलमा लामबद्ध

हेटौँडा। प्रतिनिधि सभा तथा प्रदेश सभा निर्वाचनको मतदान बिहानैदेखि जारी छ। मकवानपुरमा पनि मतदान गर्न मतदाता उत्साहित देखिएका छन्। बिहान ७ बजेबाट सुरु भएको मतदान प्रक्रियाको लागि मतदाताहरू ६ बजेबाटै लामबद्ध भएका थिए।

मकवानपुर भरका मतदान केन्द्रमा मतदान सुरु भइसकेको मुख्य निर्वाचन कार्यालयले जनाएको छ ।

बिहानै मतदाताहरू मतदान स्थल पुगिसकेको र लाइनबद्ध रूपमा मतदान गर्न आतुर रहेको देखिन्थे । मतदाता परिचयपत्र, नागरिकता लिई मतदाताहरू आफ्नो उम्मेदवारलाई मतदान गर्न लाइनबद्ध भएका छन् ।

मकवानपुर जिल्लामा दुई वटा प्रतिनिधि सभा र चार प्रदेशसभा निर्वाचनमा कुल ३ लाख ७ सय ३३ जना मतदाता रहेका छन् । मकवानपुरको क्षेत्र १ मा ६२ वटा मतदान स्थलमा १ सय ७२ वटा मतदान केन्द्र रहेका छन् । त्यस्तै, क्षेत्र २ मा १ सय ५ वटा मतदान स्थलमा १ सय ९२ वटा मतदान केन्द्र रहेको निर्वाचन कार्यालयले जनाएको छ ।

जिल्ला प्रशासन कार्यालय मकवानपुरका प्रमुख जिल्ला अधिकारी राजेन्द्रदेव पाण्डेका अनुसार जिल्लामा नेपाली सेना, नेपाल प्रहरी, सशस्त्र प्रहरी बल र म्यादी प्रहरीसहित जिल्लामा ४५ सय सुरक्षाकर्मी परिचालन गरिएको छ ।

१६७ वटा निर्वाचन स्थल र ३६४ वटा मतदान केन्द्र रहेको जिल्लामा अस्थायी मतदाताका लागि भीमफेदी कारागार र जिल्ला प्रशासन कार्यालयलाई अस्थायी मतदान मतदान केन्द्र तोकिएको छ ।

जिल्लामा अस्थायी मतदाता नामावलीमा नाम भएका तर मतदान केन्द्रमा नखटिने कर्मचारी, सुरक्षाकर्मी, वृद्धाश्रममा रहेका व्यक्ति, निर्वाचन कसुरमा सजाय पाएका बाहेक अन्य कैदी बन्दीलगायतका लागि २ अस्थायी मतदान केन्द्र कायम गरिएको हो ।

मतदान कार्य साँझ ५ बजे सम्म हुनेछ । मतदान स्थल र वरिपरिका क्षेत्रमा कडा सुरक्षा रहेको समेत छ ।