प्रकाशमानको दाबी- खानेपानीको बाहेक काठमाडौं १ का सबै समस्या हल भइसक्यो

काठमाडौं । नेपाली कांग्रेसका नेता एवम् आसन्न प्रतिनिधि सभा निर्वाचनका लागि काठमाडौं क्षेत्र नं. १ का उम्मेदवार प्रकाशमान सिंहले आफू भाषण नभइ काम गर्ने माननीय भएको बताएका छन् । मंगलबार काठमाडौंमा आयोजित चुनावी सभालाई सम्बोधन गर्दै उनले भने, ‘माननीय-माननीय भनेर मात्रै हुँदैन । इच्छाशक्ति भएको माननीय चाहिन्छ । भाषणभन्दा काम गर्ने माननीय चाहियो । मचाहिँ भाषणभन्दा पनि आफ्नै लयमा काम गर्न चाहन्छु, म त्यस्तो माननीय हुँ । म भाषणभन्दा काम गर्न रुचाउँछु ।’

नेता सिंहले आफ्नो क्षेत्रमा अघिल्लो कार्यकालमा खानेपानीको बाहेकका सबै समस्या हल गरेको दाबीसमेत गरे, भने— ‘मैले इमान्दारिताका साथ भन्छु, मैले मेरो क्षेत्रमा खानेपानीको बाहेक सबै समस्या हल गरेको छु । अब पुन: बाँकी रहेका र भावी दिनमा आउने समस्यालाई पनि हल गर्नुपर्छ । त्यसका लागि तपाईंहरूले मलाई जिताउनुपर्छ । आज यहाँका गल्ली-गल्ली छिरेर हेर्नुस् । बोलेभन्दा धेरै काम गरेको छु ।’

२०४८ सालसम्म काठमाडौं १ नेकपा (एमाले) को क्षेत्र रहेको र ०६४ पछि मात्रै कांग्रेसले लिएको सुनाउँदै नेता सिंहले भने, ‘तपाईंहरू हेर्नुस् न, ०६४ अगाडिसम्म कस्तो थियो यो क्षेत्र र ०६४ पछि हेर्नुस् । यो क्षेत्रमा कांग्रेसको उपस्थिति भएपछि राम्रै विकास भएको छ । यसलाई सबैले स्वीकार्नुपर्छ । हामीले जब मौका पायौँ, तब यहाँ धेरै विकास भएका छन् ।’

उनले आफूले सबै कामहरू पारदर्शीरूपमा गरिरहेको र अबका दिनमा पनि यसलाई निरन्तरता दिने बताए ।