नागरिकता विधेयकमाथी संसदीय समितिमा छलफल हुँदै

नेपालभ्युज

काठमाडौं । नागरिकता विधेयकमाथी आज सोमबारदेखि संसदीय समितिमा छलफल हुँदैछ । राष्ट्रपति विद्यादेवी भण्डारीले पुनर्विचारका लागि फिर्ता पठाएको नागरिकता विधेयकमाथि राष्ट्रियसभाको विधायन व्यवस्थापन समितिमा छलफल हुन लागेको हो । समितिको बैठक दिउँसो १२ बजेको लागि बोलाईएको छ ।

बैठकमा गृहमन्त्री बालकृष्ण खाण, गृहसचिव टेकनारायण पाण्डे, कानून, न्याय तथा संसदीय मामिला मन्त्रालयका सचिव उदयराज सापकोटालाई आमन्त्रण गरिएको छ । प्रतिनिधिसभाबाट हुबहु पारित गरेको विधेयकलाई आइतबार बसेको राष्ट्रियसभा बैठकले प्रक्रियागत रूपमा अघि बढाउने सर्वसम्मत निर्णय गरेको थियो ।

आइतबारको बैठकमा गृहमन्त्री बालकृष्ण खाणले राष्ट्रपतिबाट सन्देशसहित फिर्ता नागरिकता विधेयकलाई पुनर्विचारका लागि विधायन समितिमा पठाउने प्रस्ताव गरेका थिए । विधायन समितिमा सत्तारुढ गठबन्धनको बहुमत छ ।