काठमाडौं। सत्ता गठबन्धनका दलले आउँदो निर्वाचनको लागि सिट बाँडफाँट गर्न बनाएको कार्यदलको बैठक आज शुक्रबार बस्दैछ । बैठक दिउँसो ४ बजे प्रधानमन्त्री निवास बालुवाटारमा बस्दैछ । बैठकमा सिट बाँडफाँटको आधार र गत चुनावमा दलले पाएका मत समेटिएको प्रतिवेदनबारे छलफल हुनेछ । शुक्रबार नै कार्यदलले काम सकेर शीर्ष नेतालाई ब्रिफिङ् गर्ने तयारी छ ।
आउँदो चुनावमा गठबन्धन गर्ने निर्णय गरेको सत्ता गठबन्धनलाई सिट बाँडफाँट गर्न मुस्किल हुने देखिएको छ । गठबन्धनले बनाएको ११ सदस्यीय कार्यदलले सिट बाँडफाँटको टुङ्गो लगाउन नसकेपछि बिहीबार शीर्ष नेताहरु बैठक बसेको थियो ।
एक नेताका अनुसार नेपाली कांग्रेसले १ सय सिटमा दाबी गरेको छ भने माओवादी केन्द्रले ६० सिटमा दाबी गरेको छ । माओवादीले यसअघि जितेको ठाउँमा स्वतः सम्बन्धित दलले नै टिकट पाउने र एमालेले जितेको ठाउँमा भागबण्डा गर्नुपर्ने मागलाई दोस्रो विकल्पका रुपमा अघि सारेको छ ।
Facebook Comment
Comment