बजेट निर्माण प्रकरण

तत्कालिन अर्थमन्त्री शर्माले सफाइ पाउने निश्चित, संसदीय समितिले भेटेन अनियमितताको प्रमाण

एमाले सांसदको फरक मत

नेपालभ्युज

काठमाडौं । करका दर हेरफेर गर्न अनधिकृत मानिस प्रवेश गराएको आरोपबाट तत्कालिन अर्थमन्त्री जनार्दन शर्माले सफाइ पाउने देखिएको छ ।

उक्त आरोपबारे छानबिन गर्न गठित संसदीय विशेष समितिले कुनै प्रमाण फेला पार्न नसकेपछि शर्मा निर्दोष सावित हुन लागेका हुन् ।

समितिले पछिल्लो पटक थपिएको समय सकिन एकदिन अगावै छानबिनको प्रतिवेदन तयार पारेको छ । समिति सचिवालयले तयार पारेको प्रतिवेदनमा करको दर हेरफेर गर्न अनधिकृत व्यक्ति प्रवेश गराएको ‘प्रमाण नभेटिएको’ लेखिएको छ ।

यसमा सत्तापक्षमा रहेका सांसदहरु एकमत भएका छन् भने प्रमुख प्रतिपक्षी नेकपा एमालेका सांसदले फरक राय दिएका छन् ।

खगराज अधिकारी, भानुभक्त ढकाल लगायतका एमाले सांसदले फरक राय राखेका थिए । बैठकपछि खगराज अधिकारीले कतिपयमा सर्वसम्मती र कतिपयमा फरक राय दिएको बताए ।

फरक मत राखेर तयार पारिएको प्रतिवेदन शुक्रबार सभामुख अग्नि सापकोटालाई बुझाइनेछ । प्रतिवेदन सार्वजनिक भएपछि शर्मालाई फेरी अर्थ मन्त्रालय फर्कने बाटो खुल्नेछ ।