नेकपा (एस)का मन्त्रीहरू एमसीसीको पक्षमा, पार्टी विपक्षमा

काठमाडौं। नेकपा एमालेबाट फुटेर ६ महीनाअघि माधवकुमार नेपाल नेतृत्वमा गठन भएको नेकपा (एकीकृत समाजवादी) भित्र अमेरिकी सहयोग परियोजना एमसीसीबारेको विवादले संकट निम्त्याएको छ।

उक्त पार्टीका मन्त्रीहरू एमसीसीको पक्षमा खुलेका छन् भने पार्टी स्थायी कमिटी र सचिवालय बैठकले एमसीसीविरुद्ध मतदान गर्ने निर्णय यसअघि नै गरिसकेको छ। यसै विवादले उक्त पार्टीभित्र चिरा–चिरा देखिएको छ।

नेकपा (एस) सम्बद्ध स्रोतका अनुसार उक्त पार्टीका चारै जना मन्त्रीहरू विरोध खतिवडा, प्रेम आले, रामकुमारी झाँक्री र कृष्णकुमार श्रेष्ठले अध्यक्ष नेपाललाई भेटी प्रधानमन्त्री शेरबहादुर देउवाभन्दा विपरीत जान नसक्ने बताइसकेका छन्।

एक वर्ष मन्त्री बन्ने गरी पार्टी फुटाउन सघाएको बताउने मन्त्रीहरूले बीचैमा सरकार छाड्ने हो भने आफूहरूले साथ नदिने धम्कीसमेत दिइसकेको एक मन्त्रीले नेपालभ्यूजलाई जानकारी दिए।

एमाले सचिवसमेत रहेकी शहरी विकासमन्त्री रामकुमारी झाँक्रीले बुधबार सञ्चारकर्मीसँग भनिसकेकी छिन्, “कि त सरकार छाडेर सडकमा जानुपर्‍यो कि सरकारमा बसेर सडकमा जानु भएन। सत्ता पनि चाहिने, सरकारको कामको विरोध पनि गर्नुपर्ने विरोधाभाषबाट मुक्त हुनुपर्छ। पार्टीले सरकार छाड्ने निर्णय गर्छ भने एक मिनेट पनि सरकारमा बस्दिनँ।”

पर्यटनमन्त्री प्रेम आलेले आफूसँग कम्तिमा पनि सात जना सांसद् रहेको बताउँदै पार्टीले एमसीसीविरुद्ध जाने निर्णय गरे पनि आफू पक्षधरहरू एमसीसीको पक्षमा प्रयोग हुने वचन प्रधानमन्त्री शेरबहादुर देउवालाई दिएको पनि स्रोतको दाबी छ।