रिहा भए दक्षिण कोरियाली पूर्वराष्ट्रपति पार्क ग्युन हे

एजेन्सी। दक्षिण कोरियाका पूर्वराष्ट्रपति पार्क ग्युन-हे रिहा भएकी छन्। उनलाई वर्तमान राष्ट्रपति मुन जे-इनले दिएको विशेष माफीमा शुक्रबार रिहा गरिएको योनहाप समाचार एजेन्सीले जनाएको छ।

भ्रष्टाचारको आरोपमा ५७ महीना जेलमा परेकी पार्कले सियोलको एक अस्पतालमा माफीको प्रमाणपत्र पाएकी छन्। जहाँ उनको काँध र कम्मरको दुखाइको कारण एक महीनाभन्दा बढी समयदेखि उपचार भइरहेको छ।

सन् २०१९ मा काँधको शल्यक्रिया गरेपछि ६९ वर्षीया पार्कले अर्को वर्ष २ फेब्रुअरीसम्म अस्पतालमा उपचार गर्ने योजना बनाएकी थिइन्।

एक हप्ताअघि न्याय मन्त्रालयले पार्कलाई नयाँ वर्षको लागि विशेष माफी दिइनेको सूचीमा समावेश गरेको घोषणा गरेको थियो।

पार्कलाई २२ वर्षको जेल सजाय सुनाइएको थियो। भ्रष्टाचारको आरोपमा महाभियोग लगाइएपछि पदमुक्त भएकी हेले २०१७ देखि सजाय भोग्दै आएकी थिइन्।

ब्लू हाउसका अनुसार पार्कको बिग्रँदै गएको स्वास्थ्यलाई ख्याल गर्दै माफी दिने निर्णय गरिएको हो।

पार्कलाई पूर्वराष्ट्रपतिको रूपमा सुरक्षा दिइए पनि अन्य विशेषाधिकारहरू भने दिइने छैन।