झापामा मोटरसाइकल दुर्घटना : घटनास्थलमै तीन जनाको मृत्यु

नेपालभ्युज

काठमाडौं । झापाको दमक नगरपालिका-२ भाङबारीस्थित भित्री सडकखण्डमा मोटरसाइकल दुर्घटना हुँदा एकै साथ तीन जनाको मृत्यु भएको छ।

प्र १-०२-०४३प ६९२६ नम्बरको तीन जना सवार मोटरसाइकल गए राति आफैँ अनियन्त्रित भएर सडकछेउको रूखमा ठोक्किँदा एकैसाथ तीन जनाको मृत्यु भएको इलाका प्रहरी कार्यालय दमकले जनाएको छ।

मृत्यु हुनेमा मोटरसाइकल चालक खोटाङ चिसापानी–४ का २३ वर्षीय अनिल विक, चितवन राप्ती– ४ का १९ वर्षीय किसन सेन्चुरी र ताप्लेजुङ भुइखोला–३ का १९ वर्षीय अनिल लामगादे रहेका छन्।

तीनै जनाको घटनास्थलमै मृत्यु भएको इलाका प्रहरी कार्यालय दमकका प्रहरी नायब उपरीक्षक नवराज कार्कीले बताए। उनीहरू सबै दमकको एक सुन पसलमा काम गर्दै आएका थिए। घटनाका सम्बन्धमा प्रहरीले थप अनुसन्धान शुरु गरेको प्रहरी नायब उपरीक्षक कार्कीले जानकारी दिए।