महाधिवेशनमा उपस्थित हुन एमालेले घरघरमा पुर्‍यायो निमन्त्रणापत्र

काठमाडौं। नेकपा एमालेको दशौँ राष्ट्रिय महाधिवेशनको प्रचारप्रसार गर्न घरघरमा निमन्त्रणापत्र पठाइएको छ। एमाले चितवनले जिल्लाभरका प्रत्येक घरमा पुर्‍याउने गरी निमन्त्रणापत्र पठाएको हो।

दशौँ महाधिवेशन प्रचारप्रसार सहयोग समितिका संयोजक विजय सुवेदीका अनुसार एक लाख ५० हजार प्रति निमन्त्रणापत्र तयार पारेर जिल्लाका ९८ वटै वडामा पठाइएको छ। थप माग भएमा पठाउने तयारी गरिएको उनले जानकारी दिए। वडा कमिटीहरूले भेला र बैठक गरेर निमन्त्रणापत्र वितरण शुरु गरिसकेको उनले बताए।

सुवेदीले भने, “पालिका, वडा र टोल कमिटी सक्रियरूपमा निमन्त्रणापत्र वितरण र प्रचारप्रसारमा जुटेका छन्।” प्रचारप्रसारका लागि स्थानीयस्तरमा विभिन्न कार्यक्रम भइरहेका छन्। उनले भने, “उद्घाटनसत्रमा सहभागी गराउन प्रत्येक घरमा निमन्त्रणापत्र नै पठाउन लागिएको हो।”

उद्घाटन कार्यक्रममा एमाले कार्यकर्तामात्रै नभएर शुभेच्छुक, शुभचिन्तकलगायत आम सर्वसाधारणलाई उपस्थित गराउन सबैलाई निमन्त्रणा गरिएको एमाले चितवनकी अध्यक्ष पार्वती रावलले बताइन्। उनले भनिन्, “चितवनबाट मात्रै उद्घाटनसत्रमा एक लाखभन्दा बढी जनसहभागिता गराउने तयारी गरिएको छ।”

एमालेको दशौँ महाधिवेशन यही १० देखि १२ मंसिरसम्म चितवनमा हुँदैछ। उद्घाटन कार्यक्रम नारायणगढस्थित नारायणी नदी किनारमा र बन्दसत्र सौराहास्थित होटल सेभेन स्टार परिसरमा हुने तय गरिएको छ।

उद्घाटनसत्र हुने नारायणी नदी किनारमा मञ्च र अन्य व्यवस्थापनको काम शुरु भइसकेको छ।

यस्तै, बन्दसत्र हुने सौराहाको होटल सेभेन स्टार परिसरमा समेत बन्दसत्र गर्ने हल निर्माणलगायत अन्य काम शुरु भइसकेको अध्यक्ष रावलले जानकारी दिइन्।

महाधिवेशन प्रतिनिधिको आवासका लागि क्षेत्रीय होटल संघ सौराहासँग तीन हजार ५०० बेड सम्झौता गरिसकिएको छ।