अख्तियारका आयुक्तलाई घुस दिने लम्बोदरलाई सम्पत्ति शुद्धीकरण मुद्दामा तीन वर्ष कैद सजाय

काठमाडौं । गैरकानूनी रुपमा सम्पत्ति आर्जन गरेको अभियोगमा सम्पत्ति शुद्धीकरण मुद्दामा दोषी ठहर भएका लम्बोदर न्यौपानेलाई सजाय निर्धारण भएको छ ।

विशेष अदालतका अध्यक्ष टेकनारायण कुँवर र सदस्य रामबहादुर थापाको इजलासले न्यौपानेलाई तीन वर्ष कैद सजाय तोकेको हो ।

नेपाल इन्जिनियरिङ कलेजका सञ्चालक समिति अध्यक्ष न्यौपानेलाई तीन वर्ष कैद संगै बिगोको दोब्बर (२५ करोड ६९ लाख ७५ हजार ९११ रुपैयाँ) जरिवाना तोकिएको छ ।

उनको उमेर, स्वास्थ्य स्थितिलगायतलाई मध्यनजर गर्दै सो सजाय तोकिएको फैसलामा उल्लेख छ ।

न्यौपानेले कलेजको नाममा हुनुपर्ने १२ करोड ८४ लाख रुपैयाँभन्दा बढी रकम अनियमितता गरेको भेटिएको विशेषले गत चैत २५ गते ठहर गरेको थियो ।

उनले कलेजको रकमबाट आफू र सञ्चालक समितिका अन्य सदस्यलाई तलब, भत्ता, गाडी र अन्य सुविधासमेत दिएका र आफ्नो आयस्रोतको आधारमा करसमेत नतिरेको ठहर छ ।

अनामनगरका लम्बोदर न्यौपानेलाई फेला पार्न बबरमहलको विशेष अदालतलाई सकस

सम्पत्ति शुद्धीकरण अनुसन्धान विभागले मुद्दा चलाएको घटना नेपाल इन्जिनियरिङ कलेजसँग सम्बन्धित हो । कलेजको सम्पत्ति हिनामिना गरेर व्यक्तिगत लाभ लिएको आरोपमा न्यौपानेविरुद्ध मुद्दा परेको थियो । न्यौपाने यसअघि ठगी मुद्दामा समेत मुछिइसकेका छन् ।

उनी विरुद्धको मुद्दा जिल्ला अदालत भक्तपुरमा विचाराधीन छ । न्यौपानेले दिएको घुस लिएको कारण नै अख्तियारका आयुक्त राजनारायण पाठकले राजीनामा दिनुपरेको थियो ।

इन्जिनियरिङ कलेजभित्रको अनियमितता मिलाउने भन्दै पाठकले अर्का व्यक्तिमार्फत दुई पटकमा ७८ लाख रुपैयाँ घुस लिएको स्वीकारेको भिडिओ सार्वजनिक भएको थियो ।

त्यो रकम कलेजका तत्कालीन अध्यक्ष न्यौपानेले दिएका थिए । न्यौपाने विरुद्ध विशेष अदालतमा समेत घुस खुवाएको आरोपको मुद्दा विचाराधीन छ ।

सम्बन्धित समाचार –

बालुवाटार जग्गा प्रकरण जस्तै सरकारले नै आरोपितमाथि रोक्यो अर्को मुद्दा

अदालतले नै अड्कायो सम्पत्ति शुद्धीकरण मुद्दा : १३ महिनामा चढेन एउटै पेशी

सरकारवादी मुद्दामा विपक्षीसँग महान्यायाधिवक्ताको उठबस, लम्बोदर न्यौपानेको दौडधुप

विद्यार्थीले कलेजमा बुझाएको पैसा खल्तीमा हाल्थे लम्बोदर