प्रधानमन्त्री कप क्रिकेटमा एपीएफको तेस्रो जित, लुम्बिनी सात विकेटले पराजित

काठमाडौं। प्रधानमन्त्री कप क्रिकेटमा सशस्त्र प्रहरीको एपीएफ क्लबले तेस्रो जित दर्ता गरेको छ।

बिहीबार भएको खेलमा एपीएफले लुम्बिनी प्रदेशलाई ७ विकेटको फराकिलो अन्तरमा पराजित गर्‍यो। जितपछि छैठौं स्थानमा उक्लिएको एपीएफको ६ खेलबाट ६ अंक भएको छ। ५ खेलमा एकमात्र जित निकालेको लुम्बिनीको २ अंक छ।

लुम्बिनीले दिएको १३४ रनको मध्यम लक्ष्य एपीएफले २२.३ ओभरमा मात्र ३ विकेट गुमाएर पूरा गर्‍याे। उसको जितमा क्याप्टेन रोहित पौडेलले ५२ रन बनाए। इक्लाख अहमदको बलमा बोल्ड हुनुअघि रोहितले ४८ बलमा ४ चौका र एक छक्काको मद्दतमा अर्धसतकीय पारी खेले।

पुरन बिक ३३ रनमा नटआउट रहे । लोकेश बमले १६ रन बनाउँदा प्रज्वल शाहीले ५ र अमर राउटेलाले ८ रन बनाए। मोहमद हुसेन, कृष्ण कार्की र इक्लाख अहमदको नाममा एकएक विकेट रह्यो।

यसअघि पहिला ब्याटिङ गरेको लुम्बिनी रमेश कुर्मीले घातक बलिङ गरेपछि ४१ ओभरमा १३३ रनमा अलआउट भएको थियो। लुम्बिनीका लागि दिलसाद अलीले नटआउट ३९ र मृनाल गुरुङले ३४ रन बनाए। बिराट भण्डारीले २३ र प्रज्वल थापाले ११ रन बनाउनुबाहेक अन्यले दोहोरो अंकको स्कोर गर्न सकेनन्।

आफ्नो स्पेलमा रमेश कुर्मीले २ ओभर मेडन फ्याल्दै २९ रन खर्चेर ५ विकेट लिए। यस्तै भुवन कार्कीले ३ विकेट लिँदा रोहित पौडेल र मौसम ढकालको नाममा एकएक विकेट रह्यो।