काठमाडौं। आगामी कार्यकालको लागि नेतृत्व छनोट गर्न अटोमाबाइल्स एसोसिएसन अफ नेपाल (नाडा)को ४७ औँ साधारण सभा आज शुक्रबार हुँदैछ।
नेपालभरका अटो व्यवसायीहरूको सहभागिता रहने साधारण सभा काठमाडौंस्थित सोल्टीमा होटल हुँदैछ ।
नाडाको आगामी कार्यकालका लागि करण चौधरी अध्यक्ष नियुक्त हुने भएका छन् ।
नाडा अध्यक्षको प्रतिस्पर्धामा चौधरी र आकाश गोल्छा थिए। तर लामो समयको कसरतपछि आगामी कार्यकालको लागि अध्यक्षमा चौधरी नियुक्त गर्ने सहमति भएको हो । त्यस्तै वरिष्ठ उपाध्यक्षमा भने गोल्छा नियुक्त गर्ने सहमति भएको छ ।
यस प्रकारको सहमतिलाई नाडाका वर्तमान अध्यक्ष ध्रुव थापाले ऐतिहासिक भएको बताउँदै आएका छन् । उनका अनुसार सहमतिमा अध्यक्ष चुन्न लामो समयदेखि प्रयास भइरहेको थियो ।
थापाका अनुसार नाडाका अन्य सदस्यहरू र पूर्व नेतृत्वकर्ताहरू समेतको उपस्थिति लामो समयको छलफलपछि गत पुस ३ गते आगामी कार्यकालको अध्यक्षमा चौधरी हुने सहमति भएको हो ।
सहमतिसँगै अध्यक्षका आकांक्षी रहेका अन्य उम्मेदवारको व्यवस्थापनको लागि नाडाले आफ्नो विधान नै संशोधन गर्दैछ । अध्यक्ष थापाका अनुसार आगामी तीन महिनाभित्र नाडाले विशेष अधिवेशन बोलाउनेछ । अधिवेशनबाट वरिष्ठ उपाध्यक्ष पद सिर्जना गरी आगामी कार्यकालदेखि वरिष्ठ उपाध्यक्ष नै अध्यक्ष बन्ने व्यवस्था गरिनेछ ।
अहिलेको सहमति अनुसार गोल्छा विशेष अधिवेसनपछि वरिष्ठ उपाध्यक्ष बन्नेछन्। यसको अर्थ चौधरीपछिको कार्यकालमा गोल्छा स्वतः अध्यक्ष बन्नेछन् ।
वर्तमान अध्यक्ष थापाका अनुसार अध्यक्षसँगै नाडाको आगामी कार्यकालको लागि सम्पूर्ण कार्यसमिति टिम समेत निर्विरोध निर्वाचित भएका छन् ।
Facebook Comment
Comment