छैटौं फारवेष्ट पशुपति कप फुटबल प्रतियोगिताको तयारी पूरा

धनगढी । छैटौं फारवेष्ट पशुपति कप फुटबल प्रतियोगिताको तयारी पूरा भएको छ । आयोजक फारवेष्ट पशुपति युवा क्लबले आज ट्रफी सार्वजनिक गर्दै पुस ६ गतेदेखि आयोजना हुने प्रतियोगिताको सम्पूर्ण तयारी पूरा भएको जनाएको हो ।

प्रतियोगिताको उद्घाटन खेलमा स्टार सिटी युवा क्लब धनगढी र पुर्नवास नगरपालिका खेलकुद विकास समिति बिच हुने क्लबका महासचिव ललित मिश्रले जानकारी दिए ।

प्रतियोगितालाई दुई चरणमा विभाजन गरि खेलाइने महासचिव मिश्रले बताए । उनले समूह ए मा स्टार सिटी, पुर्नवास नगरपालिका खेलकुद विकास समिति, टेकवहादुर चोखाल फाउण्डेसन, घोडाघोडी युवा क्लब, विएस १५ फुटबल एकेडेमी, एपिएफ ७ नम्बर वाहिनी, भारतको सिएफसी क्लब कोलकाता र सुदुरपश्चिम ११ स्पोर्टस क्लब रहेका छन्।

त्यस्तै समूह बी मा ईलाईट युवा क्लब, अल स्टार्स एकेडेमी, वाईज युनियन लम्की, नेपाल प्रहरी सुदुरपश्चिम प्रदेश, पुर्नवास युनाईटेड क्लब, ग्रीन सिटी क्लब र आयोजक फारवेष्ट पशुपति युवा क्लब रहेका छन् ।

प्रतियोगिताको विजेताले ट्रफीसँगै ५ लाख र उपविजेताले २ लाख पाउने छन् । प्रतियोगिताको उत्कृष्ट खेलाडीलाई २५ हजार तथा विभिन्न विधाका उत्कृष्टले १५–१५ हजार रुपैयाँ पुरस्कार पाउने आयोजक फारवेष्ट पशुपति युवा क्लबका महासचिव मिश्रले बताए ।

प्रतियोगिताको उदघाटन सुदूरपश्चिम प्रदेशका सामाजिक विकास मन्त्री माननीय झपट साउदले गर्ने तय भएको आयोजले जानकारी दिएको छ ।

यसैगरी प्रत्येक खेलको म्यान अफ द म्याचले पाँच हजार नगद पाउने छन् । सबै धनराशी जोडेर आठ लाख ७० हजार नगद पुरस्कार दिईने आयोजक फारवेष्ट पशुपति युवा क्लबले जनाएको छ । प्रतियोगिता सञ्चालनमा झण्डै ५० लाख रुपैयाँ खर्च हुने अनुमान गरिएको छ।