शंकर पोखरेल भन्छन्, ‘अहिले हाम्रा लागि सत्ता प्रधान होइन’

प्रमुख प्रतिपक्ष दल नेकपा (एमाले)का महासचिव शंकर पोखरेलले आफ्नो पार्टीले सत्तालाई प्राथमिकता नदिएको दाबी गरेका छन्। नेकपा (एमाले) रामेछाप–काठमाडौं सम्पर्क मञ्चको शनिबार काठमाडौंमा आयोजना गरेको एक कार्यक्रममा बोल्दै उनले यस्तो बताए।
पोखरेलले आफूहरूको लागि सत्ता प्रधान नभई राष्ट्रको भविष्य प्रधान भएको बताएका हुन्।

उनले भने, ‘‘अहिले हाम्रा लागि सत्ता प्रधान होइन। हाम्रा लागि राष्ट्रको भविष्य प्रदान हो। अब यो राष्ट्र निर्माण गर्नका लागि कमजोरहरूको सहकार्यबाट राष्ट्रको निर्माण हुन सक्दैन। बलियो राष्ट्रिय शक्तिको रूपमा नेकपा एमालेको विकास अबको हाम्रो संकल्प हो भन्ने मान्यताको आधारमा हामीले मिसन ग्रासरुट अभियान थालेका थियौं।’

कमजोर राजनीतिक शक्ति माओवादी केन्द्र नेतृत्वको सरकारलाई मानेर अघि बढ्नुपर्ने बिडम्बनापूर्ण भएको उनले बताए।
उनले राजनीतिक दल धेरै भएकाले पनि अस्थिरता भएको बताए। नेपाली समाजले अब एउटा बलियो राजनीतिक शक्ति निर्माणको विषयमा बहस पैरवी गर्ने बेला आएको पनि उनले बताए।