नार्कको निमित्त प्रमुखमा कनिष्ठलाई नियुक्त गरिएपछि लफडा

काठमाडौं। नेपाल कृषि अनुसन्धान परिषद् (नार्क) को निमित्त प्रमुखमा कनिष्ठलाई नियुक्त गरिएको भन्दै विज्ञप्ति जारी गरी कृषि वैज्ञानिकहरूले आपत्ति जनाएका छन ।

मंगलबार कृषि वैज्ञानिकहरूको संस्था सोसाइटी अफ एग्रिकल्चर साइन्टिस्ट नेपाल (सास) ले विज्ञप्ति जारी गर्दै यस्तो असन्तुष्टि व्यक्त गरेको हो ।

गत ३१ जेठमा कृषि मन्त्रालयले नार्कको कायम मुकायम कार्यकारी निर्देशकको जिम्मेवारी डा. ध्रुवराज भट्टराईलाई दिएको थियो ।

नार्कका कार्यकारी निर्देशक डा. दीपक भण्डारीको कार्यकाल सकिएपछि उनले डा. दोजराज खनाललाई निमित्तको जिम्मेवारी दिएका थिए । तर, कृषिमन्त्री वेदुराम भुसालले डा. खनाललाई हटाएर ४०औं नम्बरमा रहेका भट्टराईलाई सो जिम्मेवारीमा ल्याएका थिए ।

क्षमतावान र उच्च वरीयताका वैज्ञानिकलाई हटाएर भट्टराईलाई नियुक्त गरेको भन्दै सासले उक्त निर्णय सच्याउन कृषिमन्त्री भुसालको ध्यानाकर्षण गराएको छ । कनिष्ठलाई नियुक्ति हुँदा नार्कको कार्यसम्पादनमै असर पर्ने चेतावनी पनि सासले गराएको छ ।

सासका अध्यक्ष डा.रामप्रसाद घिमिरेले विज्ञप्ति जारी गर्दै कृषि मन्त्री भुसाललाई यो निर्णय तत्काल सच्याउन अनुरोध गरेका छन् ।