काठमाडौं । सत्तारूढ दल नेपाली कांग्रेसको संस्थापनइतर पक्षीय नेविसंघले सङ्घीय शिक्षा ऐनलगायतका शिक्षासम्बन्धी ऐनहरू संसद् लानुपर्ने माग गर्दै प्रदर्शन गरेको छ । विद्यार्थी नेताहरूले नयाँबानेश्वरस्थित सङ्घीय संसद् भवनअगाडि प्रदर्शन गरेका हुन् ।
नाराबाजीसहित प्रदर्शनमा उत्रिएका विद्यार्थी नेताहरूलाई प्रहरीले पक्राउ गरेको छ । पक्राउ पर्नेहरूमा गोविन्द कोइराला, सुजन तामाङ, जेनिश काफ्ले, राजन रोकाया, गगनराज गजुरेल, सुदीप शाह, मन्दीप शाह, उत्सव सुवेदी, मौसम न्यौपाने, रविन तिवारी, गणेश सार्की, रविनकार्कीलगायत छन् ।
उच्च शिक्षा ऐन २०७६, संघीय शिक्षा ऐनलगायतका विभिन्न शिक्षासम्बन्धी ऐनहरू संसद् नलगिँदा विश्वविद्यालय, क्याम्पस तथा विद्यलयहरूमा शिक्षाको लागि आवश्यक नीतिगत निर्णय नभएर शिक्षा क्षेत्र पछाडि परेकोको जिकिर उनीहरूको छ ।
शिक्षाजस्तो संवेदनशील र अतिआवश्यक विषयमा नीति बनाउने ठाउँमा बसेर मस्यौदासमेत संसद्मा प्रस्तुत नगर्नु गैरजिम्मेवारपूर्ण र सम्पूर्ण विद्यार्थीको अहित भएको उनीहरूको आरोप छ । आफूहरूको मागलाई सरकारले गम्भीररूपमा लिनुपर्ने उनीहरूको माग छ । माग सम्बोधन नभए आन्दोलन नरोक्ने उनीहरूको चेतावनी छ ।
Facebook Comment
Comment