उडिरहेको जहाजमा यात्रुले आपतकालीन ढोका खोल्दा १२ जना घाइते

नेपालभ्युज

काठमाडौं। दक्षिण कोरियामा उडिरहेको जहाजमा एक यात्रुले आपतकालीन ढोका खोल्दा विमानमा सवार १२ जना यात्रु घाइते भएका छन् । शुक्रबार उडिरहेको विमानमा यात्रुले आपतकालीन निकास (एक्जिट) ढोका खोलेका थिए, जसको कारण जहाजभित्र हावा पसेर १२ जना घाइते भएका थिए । यद्यपि, जहाजका चालकदलले विमान सकुशल अवतरण गरेका थिए ।

एसियाना एयरलाइन्सको एयरबस ए३२१ विमानमा सवार एक व्यक्तिले उक्त आपतकालीन ढोका आंशिक रूपमा खाेलेका थिए । जहाजमा सवार अन्य यात्रुले रोक्दा ढोका पूर्णरूपमा खुल्न पाएन । यसले गर्दा सम्भावित घटना टरेको थियो ।

ती व्यक्तिलाई हवाई सुरक्षा कानुन उल्लंघन गरेको आराेपमा विमानस्थल प्रहरीले नियन्त्रणमा लिएको छ । उक्त व्यक्तिको पहिचान भने खुलाइएको छैन । कोरियाकाे कानुनअनुसार दोषी यात्रुलाई १० वर्षसम्म जेल सजाय हुने नीति छ ।