एजेन्सी। पाकिस्तानको सेनाले आफ्नो संगठनविरुद्ध षड्यन्त्र रच्ने र सैन्य प्रतिष्ठानमा आक्रमण गर्नेहरूलाई सेनाको कानुन र आधिकारिक गोपनीयता अन्तर्गत कारबाही गर्ने चेतावनी दिएको छ ।
सेनाको जनसम्पर्क विभाग आईएसपीआरले आक्रमणकारीविरुद्ध ठोस प्रमाण रहेको जनाएको छ । सेना प्रमुख असिम मुनीरले विशेष कोर कमाण्डर सम्मेलनको अध्यक्षता गर्दै सेनाविरुद्ध षड्यन्त्र गर्नेलाई कुनै हालतमा नछाड्न निर्देशन पनि दिएका छन् । उक्त बैठकमा पाकिस्तानमा विगत केही दिनदेखिको व्यवस्थाको अवस्थाको समीक्षा गरिएको थियो ।
आईएसपीआरका अनुसार सम्मेलनमा भनिएको थियो, “शहीदहरूका तस्बिरहरू, भवनहरू र सैन्य प्रतिष्ठानहरूलाई बदनाम गर्नेहरुलाई प्रतिक्रिया दिन बाध्य पार्ने उद्देश्यले काम भइरहेका छन्।”
यो भनाई पूर्व प्रधानमन्त्री इमरान खानलाई लक्षित गरेर आएको हो । इमरानले पछिल्लो समय सेनालाई लक्षित गरेर आक्रामक भाषण गर्दै आएका छन् ।
कमाण्डर सम्मेलनले यी घटनाको निन्दा गरेको छ ।कोर्प्स कमाण्डरको बैठकमा सबै कमाण्डरले पाकिस्तानमा राजनीतिक स्थायित्व ल्याउन सबै दल मिलेर काम गर्नुपर्ने र पाकिस्तानमा लोकतान्त्रिक प्रक्रिया सुदृढ हुनुपर्ने बताएका छन् ।
गत हप्ता मंगलबार इमरान खानका समर्थकहरू धेरै शहरहरूमा सडकमा विरोधमा उत्रिएका थिए । यी समर्थकहरूको क्रोध विशेष गरी पाकिस्तानी सेनामाथि परेको थियो। आक्रोशित भीडले लाहोरस्थित सेनाका कमाण्डरको घरमा आक्रमण गरेको थियो ।
लाहोर बाहेक रावलपिंडीमा रहेको सेनाको मुख्यालयमा पनि मानिसहरु प्रवेश गरेका थिए ।
Facebook Comment
Comment