धनगढी । दुवै उम्मेदवारले बहुमत पाउन नसकेपछि सुदूरपश्चिम प्रदेशले आज पनि सभामुख पाउन सकेन । यहाँ माओवादी केन्द्रबाट भीम भण्डारी र नेपाली काङ्ग्रेसबाट मनाबहादुर रावल सभामुखका उम्मेदवार छन् ।
५३ जना प्रदेश सभा सदस्य रहेको सुदूरपश्चिममा बहुमत पाउन २७ सांसद आवश्यक पर्छ । आज भएको मतदानमा दुवै उम्मेदवारले २२-२२ मत पाए । नागरिक उन्मुक्तिका ७ सांसदले मतदानमा भाग लिएनन् ।
प्रदेशसभामा कांग्रेसका १९, माओवादीका ११, एमालेका १०, नेकपा एकीकृत समाजवादीका ४, राप्रपाका १ र स्वतन्त्र १ सांसद छन् ।
विशेष समयमा बोल्दै नागरिक उन्मुक्तिका प्रमुख सचेतकले आफूहरूको माग सम्बोधन नभएको भन्दै कतै मत नदिने बताएका थिए ।
उन्मुक्तिको ७ मत नपाउँदा सत्ता गठबन्धनका उम्मेदवार भण्डारीले २२ मत मात्रै पाए । कांग्रेस उम्मेदवार रावलले आफ्नो पार्टी र नेकपा एकीकृत समाजवादीका मत पाए ।
ज्येष्ठ सदस्य शिवराज भट्टले सभा चलाइरहेकाले मत दिन पाएनन् । यस अघि बिहीबार पनि दुवै उम्मेदवारले बहुमत पाउन सकेका थिएनन् ।
Facebook Comment
Comment