प्रधानमन्त्री प्रचण्ड चितवन पुगे

काठमाडौं। प्रधानमन्त्री नियुक्त भएपछि प्रचण्ड पहिलोपटक गृहजिल्ला चितवन पुगेका छन्। प्रधानमन्त्री दाहाल नारायणी नमुना माध्यमिक विद्यालयको हीरक महोत्सव (६०औँ वार्षिकोत्सव समारोह) उद्घाटन गर्न चितवन गएका हुन्।

हीरक महोत्सवमा सहभागी भएर उनी आजै काठमाडौं फर्कने कार्यक्रम छ। विद्यालयका प्राचार्य पूर्ण दवाडीका अनुसार सो विद्यालय गुणस्तर मापन केन्द्रको परीक्षणमा देशकै दोस्रो विद्यालय हो। हालै गरिएको परीक्षणमा १०० अंकमा ९३.०५ अंक प्राप्त गरी दोस्रो भएको उनले बताए।

विसं २०२० जेठ ६ गते रात्रिकालीन विद्यालयबाट पठनपाठन सुरु गरेको यस विद्यालयमा हाल तीन हजार ५७० विद्यार्थी अध्ययनरत छन्।

प्रधानमन्त्री दाहालले आज विद्यालयको हीरकद्वारको उद्घाटन, हीरक स्तम्भको अनावरण, स्मारिका विमोचन, नवनिर्मित भवनको शिलान्यास, विज्ञान प्रदर्शनी र खाना महोत्सवको उद्घाटन गर्ने कार्यक्रम छ।