कोभिडको धरासायी अर्थत‍न्‍त्र सुधार्न श्रीलंकाले ल्यायो ‘आशा’, १० लाख रोजगारी सिर्जना गर्ने लक्ष्य

एजेन्सी। श्रीलङ्का सरकारले ‘श्रीलङ्काका लागि आशा’ नामक कार्यक्रममार्फत् युवाहरूका लागि १० लाख नयाँ रोजगारीका अवसर सिर्जना गर्ने योजना सार्वजनिक गरेको छ।

देश कोभिड–१९ को महामारीबाट सामान्य अवस्थामा फर्कने विश्वाससहित महामारीबाट प्रभावित अर्थतन्त्रलाई सुधार गर्न र युवाहरूमा आशाको सञ्चार गर्न सरकारले यो कार्यक्रम ल्याउन लागेको खेलकुद तथा युवा, विकास सहजीकरण तथा अनुगमन मन्त्री नमल राजपाक्षले बताए।

‘श्रीलङ्काको आशा’ कार्यक्रम मे महिनामा शुभारम्भ गरिने र देशका नौवटै प्रदेशलाई समेट्ने उनले बताए।

रोजगारी खोज्ने, उद्यमी, वैदेशिक रोजगार अभिकर्ता, सीप विकास, व्यावसायिक तालीममा सलग्नलाई एक छानामुनि ल्याइने रोजगारीको अभावको दिगो समाधान प्रदान गरी युवालाई अन्य आयआर्जनका अवसरहरुमा परिचित गराई मुलुकको आर्थिक विकासमा योगदान पु¥याउने कार्यक्रमको उद्देश्य रहेको उनले बताए।

सरकारी र निजी दुवै क्षेत्रमा रोजगारीका अतिरिक्त दक्ष कामदारका रूपमा युवालाई विदेश जान वा उद्यमीका रूपमा नयाँ व्यवसाय सुरु गर्न आग्रह गरिने मन्त्री राजापाक्षले बताए।

श्रीलङ्काका स्वास्थ्य अधिकारीहरूले गत हप्ता अधिकांश नागरिकहरूलाई खोप लगाइएको र उनीहरूलाई खोपको अतिरिक्त मात्रा पनि दिइएपछि कोभिड–१९ महामारी देशभर सहज हुँदै गएको बताएका छन्।