माघीको शुभकामना दिँदै मुख्यमन्त्री केसीले भनेः संस्कृति जोगाउँदै अघि बढ्नुपर्छ

बुटवल। लुम्बिनी प्रदेशका मुख्यमन्त्री कुल प्रसाद केसी (सोनाम) ले लोकतान्त्रिक मूल्य र मान्यतामा आधारित संघीयताको कार्यान्वयन गर्दै समाजवादप्रति प्रतिबद्ध रहनुपर्ने बताएका छन्।

“माघे संक्रान्ति एवं माघी २०७८” को अवसरमा विज्ञप्तिमार्फत शुभकामना दिँदै मुख्यमन्त्री केसीले लुम्बिनी प्रदेश बहुजाति, बहुभाषिक र बहुसंस्कृतिले भरिपूर्ण रहेको उल्लेख गर्दै विविध जाति, भाषा, संस्कृति र भेषभूषालाई एकीकृत गरी अगाडि बढेमा मात्रै समृद्ध प्रदेशको निर्माण गर्न सक्ने उल्लेख गरे।

उनले लुम्बिनी प्रदेश सरकार निर्माणको पहिलो वर्षदेखि थारू र मगर समुदायको महान् पर्व माघे संक्रान्ति र माघीको उपलक्ष्यमा प्रदेश सरकारको तर्फबाट पौष अन्तिम दिन प्रदेश सरकारको तर्फबाट सांस्कृतिक झाँकीसहित माघे संक्रान्ति एवं माघी मिलन कार्यक्रम आयोजना गरिएको सन्दर्भमा यस पटक कोभिड-१९ को तेस्रो लहर ओमिक्रोनको महामारीको कारणले गर्दा सो कार्यक्रम स्थगित गरिएको बताए। उनले प्रदेश सरकारको तर्फबाट माघ १ र २ गते प्रदेशभर सार्वजनिक बिदा दिइएको पनि जानकारी दिए।