जनकपुरधाम। नेपाली कांग्रेसको केन्द्रीय महाधिवेशनमा शेरबहादुर देउवा, डा. शेखर कोइराला, प्रकाशमान सिंह, विमलेन्द्र निधि र कल्याण गुरुङ उम्मेदवार थिए। देउवाबाहेक सबै नेताहरुको नारा नेतृत्व परिवर्तन थियो।
पहिलो चरणमा कसैले बहुमत पुर्याउन नसकेपछि सर्वाधिक धेरै मत ल्याउने दुई उम्मेदवार शेरबहादुर देउवा र शेखर कोइरालाबीच सभापतिमा दोस्रो चरणमा प्रतिस्पर्धा हुने भयो।
यतिबेला नेतृत्व परिवर्तनका पक्षधरहरू मिलेर देउवालाई हराउँछन् भन्ने धेरैको अनुमान गलत भइदियो। सिंह, निधि र गुरूङ आफ्नै नाराविपरीतको बाटोमा लागे। अन्ततः एक्लो भएका शेखर पराजित भए। क्रियाशिल सदस्यताको विवादका कारण यसअघि हुन नसकेको प्रदेश २ को अधिवेशन कांग्रेसले अहिले भर्खरै गर्दैछ। तर, यहाँ फरक अवस्था देखिएको छ।
केन्द्रमा नमिलेका निधि र कोइरालाले यहाँ संस्थापन पक्षका उम्मेदवार कृष्णा यादवविरुद्ध साझा उम्मेदवार खडा गरेका छन्। निधि–कोइराला प्यानलबाट रामसरोज यादवले उम्मेदवारी दिएका हुन्। प्रदेश २ मा नयाँ नेतृत्वका लागि बुधबार मतदान हुँदैछ।
को कुन प्यानलबाट ?
निधि–कोइराला प्यानल
सभापति : रामसरोज यादव
उपसभापति : धनलाल ठोकर (रौतहट : निधि पक्ष)
उपसभापति : विनोद खनाल (सर्लाही : कोइराला पक्ष)
महामन्त्री : नरेश यादव (सिरहा : कोइराला पक्ष)
महामन्त्री : हरेस महतो (सर्लाही : निधि पक्ष)
सहमहामन्त्री : अरविन्द अमात्य (पर्सा : निधि पक्ष)
सहमहामन्त्री : विनोद यादव (महोत्तरी : कोइराला पक्ष)
सहमहामन्त्री : निर्मला सुवेदी (बारा)
देउवा प्यानल
सभापति :कृष्णा यादव
उपसभापति : वीरेन्द्र सिंह (सर्लाही)
उपसभापति : चन्द्रशेखर यादव (बारा)
महामन्त्री : उपेन्द्र यादव (सिरहा)
महामन्त्री : वृहस्पतिकुमार श्रेष्ठ (पर्सा)
सहमहामन्त्री : जयनारायण यादव (बारा)
सहमहामन्त्री : परशुराम चौधरी (सप्तरी)
सहमहामन्त्री : रीता यादव (सप्तरी)
बुधबार मतदान
प्रदेश २ मा बुधबार नेतृत्वका लागि मतदान तय भएको छ। यस अधिवेशबाट प्रदेश सभापति, दुई उपसभापति, एक महामन्त्री, एक महिलासहित तीन सहमहामन्त्री र सदस्यहरु चयन हुन्छन्। प्रदेश अधिवेशनमा एक हजार ९ सय ८० मतदाता सहभागी छन्। प्रदेश २ का आठवटै जिल्लामा जिल्ला अधिवेशन समेत हुन बाँकी छ। यसअघि क्रियाशील सदस्यता विवादका कारण प्रदेश अधिवेशन हुन नसकेपछि केन्द्रीय महाधिवेशनका लागि महाधिवेशन प्रतिनिधि मात्रै चयन गरिएको थियो। केन्द्रीय महाधिवेशनपछि प्रदेश २ को प्रदेश अधिवेशन र बाँकी रहेका जिल्लामा जिल्ला अधिवेशन गर्ने निर्णय कांग्रेसले त्यतिबेला नै गरेको थियो।
के भन्छन् सभापतिका प्रत्यासी ?
रामसरोज यादव : मलाई सबैको समर्थन रहेकोले मेरो जित सुनिश्चित छ । कांग्रेसभित्र गुट उपगुट समाप्त पारेर पार्टीलाई मजबुत बनाउनकै लागि मैले उम्मेदवारी दर्ता गराएको हुँ ।
कृष्णा यादव : निर्वाचनपछि पार्टीलाई अझै शशक्त बनाउनेछु। कांग्रेसका सबै नेता कार्यकर्तालाई साथ लिएर अगाडी बढ्नेछु।
Facebook Comment
Comment