नेपाल भ्रष्टाचार व्याप्त मुलुककै सूचीमा, गतवर्ष भन्दा केही सुधार भए पनि अवस्था नाजुक

काठमाडौं । नेपालमा भ्रष्टाचारसम्बन्धि सूचकांकमा गतवर्ष भन्दाकेही सुधार भए पनि भ्रष्टाचार व्याप्त मुलुककै सूचीमा परेको छ ।

ट्रान्सपरेन्सी इन्टरनेशनल (टीआई) ले आज सार्वजनिक गरेको सन् २०२३ को भ्रष्टाचार अवधारणा सूचकांक (सीपीआइ)का अनुसार नेपाल विश्वका भ्रष्ट मुलुकमध्येमै छ । यद्यपी गत वर्षभन्दा केही सुधार भएको छ ।

सीपीआई २०२३ मा नेपाललाई १०० मा ३५ अंक दिइएको छ । १८० मुलुकमध्ये नेपाल १०८ औं स्थानमा छ । सीपीआई २०२२ मा नेपाल ३४ अंकसहित ११० औं स्थानमा थियो ।

प्रतिवेदन सार्वजनिक गर्दै ट्रान्सपरेन्सी नेपालकी अध्यक्ष पद्मिनी प्रधानाङ्गले यो प्रतिवेदन अनुसार नेपालको सुशासनको अवस्था नाजुक रहेको बताइन । उनले सरकार भ्रष्टाचार नियन्त्रण गर्न असफल रहेको, कमजोर न्याय प्रणालीका कारण दण्डहिनता बढेको समेत बताइन् ।

१८० देश सम्मिलित यस सूचकांकमा डेनमार्क ९० अंक प्राप्त गरी सबैभन्दा कम भ्रष्टाचार हुने मुलुक बनेको छ । सोमालिया ११ अंक प्राप्त गरी सबैभन्दा बढी भ्रष्टाचार हुने मुलुकका रुपमा छ ।

यस सूचकांकमा १०० अंकले अति स्वच्छ र ० अंकले अति भ्रष्ट भन्ने जनाउँदछ । ५० भन्दा कम अंक प्राप्त गर्ने मुलुकलाई भ्रष्टाचार व्याप्त मुलुकको रुपमा चिनिन्छ । विश्वका दुई तिहाई भन्दा बढी मुलुकले ५० भन्दा कम अंक पाएका छन् ।

रिपोर्टमा विगत १ दशकमा सार्वजनिक क्षेत्रको भ्रष्टाचार नियन्त्रण गर्ने कार्यमा प्रगति हुन नसकेको, सरकारहरु भ्रष्टाचार नियन्त्रण गर्ने कार्यमा असफल रहेको, कमजोर न्याय प्रणालीले भ्रष्टाचारलाई मलजल पुऱ्याएको जस्ता विषय उल्लेख गरिएको छ ।