भैरहवा र पोखरा अन्तर्राष्ट्रिय विमानस्थल पूर्ण सञ्चालनमा नआएकोप्रति राष्ट्रपतिको असन्तुष्टि  

काठमाडौं । राष्ट्रपति रामचन्द्र पौडेलले भैरहवा र पोखरा अन्तर्राष्ट्रिय विमानस्थल अझै पूर्ण रूपमा सञ्चालनमा नआएकोमा असन्तुष्टि व्यक्त गरेका छन् ।

होटल संघ नेपाल (हान) ले मंगलबार काठमाडौंमा आयोजना गरेको सत्कार दिवसको कार्यक्रममा बोल्दै उनले दुवै अन्तर्राष्ट्रिय विमानस्थलहरू पूर्ण रूपमा सञ्चालनमा आए बढीभन्दा बढी विदेशी पर्यटकहरू भित्र्याएर मुलुकलाई समृद्ध बनाउने काममा कठिनाइ नहुने बताए ।

उनले सो अन्तर्राष्ट्रिय विमानस्थलहरू छिट्टै पूर्ण रूपमा सञ्चालनमा आउनेमा आफू आशावादी रहेको समेत बताए ।

होटल क्षेत्र नेपालको अर्थतन्त्रको प्रमुख आधारको रूपमा रहेको उल्लेख गर्दै राष्ट्रपति पौडेलले यसमार्फत राष्ट्रको समृद्धिका लागि ध्यान दिन पनि होटल व्यवसायीहरूलाई आग्रह गरे ।

राष्ट्रपति  पौडेलले नेपालको रैथाने खानालाई सोझै कृषकहरूसँग सहकार्य गरेर पर्यटकहरूको सत्कारमा लगाउन सके त्यसले होटल क्षेत्रको विकासमा थप योगदान दिन सक्ने बताए ।

राष्ट्रपति पौडेलले नेपालको विशिष्टता, प्राकृतिक सौन्दर्यता, संस्कृति र सभ्यतालाई विश्व पर्यटन बजारमा प्रवद्र्धन गरी पर्यटन क्षेत्रलाई आयआर्जन र समृद्धिको आधारको रूपमा स्थापित गर्नुपर्नेमा जोड दिए ।