काठमाडौं । नेकपा एकीकृत समाजवादीका अध्यक्ष माधवकुमार नेपालले अहिले गठबन्धनको सरकारलाई कसैले तलमाथि गर्न नसक्ने बताएका छन् । आफूहरुको साथ हुन्जेल अहिलेको सरकारलाई कसैले तलमाथि गर्न नसक्ने उनको भनाइ छ ।
नेकपा एमालेले कोशी प्रदेशमा नयाँ खालको समस्या उत्पन्न गराएर गठबन्धन तोडाउन खोजेको उनको आरोप छ । ‘कोशी प्रदेशमा नयाँ समस्या खडा भयो । त्यसले यो सरकारमाथि आशंका उठेको हुनसक्छ । यो सरकारलाई कसैले ढाल्न सक्दैन’, उनले भने, ‘कसैले जतिसुकै फुर्ती देखाए पनि यो फुर्ती चल्नेवाला छैन । किनभने हामी छौं ।’
एकीकृत समाजवादीको सुर्खेतमा आयोजित जागरणसभालाई सम्बोधन गर्दै उनले एमालेलाई धेरै चुरीफुरी नगर्न चुनौती पनि दिए । ‘चुरीफुरी धेरै नगर्नुस् तपाईंहरुको खुट्टी हामीले देखिसकेका छौं । के गर्न सक्नुहुन्छ, के गर्न सक्नुहुन्न हामीलाई थाहा छ’, उनले भने ।
उनले देशलाई सही दिशामा अघि बढाउन गठबन्धन अपरिहार्य भएको तर्क गरे ।
Facebook Comment
Comment